USA ka bayot gituohang gitulis ug gipatay sa wa mailhing tawo ug napalgan sa sulod sa iyang panimalay sa Lamac, Barangay Pondol, lungsod sa Balamban nga way kinabuhi niadtong Huwebes, Oktubre 15, ala 1:00 sa hapon.
Si Jonathan Rosario Suico, 65, kanhi overseas Filipino worker (OFW), nakaangkog daghang samad dinungaban sa dughan ug ubang parte sa kalawasan.
Si Police Staff Sgt. Ronald Balimbing, sa Balamban Police Station nga nahinabi sa Superbalita Cebu, nagkanayon ang kabanay sni Suico maoy nipahibalo sa insedente human siya nakit-an nga nagbuy-od diha sa sala nga wala nay kinabuhi.
Sa pag-abot sa mga pulis ug imbestigasyon, nahanaw ang daghang alahas ni Suico.
Ang mga kabanay mibutyag nga halos puno ang mga kamot ug lawas sa mga dagkong alahas ang biktima.
Nagkatag sa sulod sa panimalay nga makita nga nisukol si Suico.
Si SPO3 Benidecto Bobilles, imbestigador sa Balamban Police Station nga nahinabi sa Superbalita Cebu, nagkanayon nga nagtuo sila nga usa lang ang mamumuno nga kaila sa biktima human walay forced entry sa panimalay.
Si Suico katapusan nga nakit-an sa iyang kabanay niadtong Martes, Oktubre 13, sa hapon nga dunay kuyog nga usa ka batan-ong lalake.
Human niadto, wala na nila makit-i nga migawas sa iyang panimalay ug nakurat nalang ang kabanay sa ilang pagsusi nga patay na.
Naanad na ang mga kabanay ni Suico ingon man mga silingan, nga dunay mga batan-ong lalake nga mobisita sa biktima.
Ang uban manuktok lang panahon sa kagabhion.
Sumala pa ni Balimbing nga wala nila isalikway nga Martes sa gabii o Miyerkules gipatay si Suico sanglit nagsugod na sa pagkadugta.
Makita sa sulod nga nagkatag ang mga butang sa lawak hangtod sa sala. Timailhan nga nakasukol ang biktima.
“Usa sa ato gitan-aw basin wala nagkasabot sa iyang gikauban, nahinaykan unya gipangdala ang mga alahas," dugang ni SPO3 Bobilles.
Nasuta nila ni Balimbing nga gawas sa daghang batan-ong lalaki nga magduawan sa panimalay sa biktima, gitan-aw sab nila ang pagka-ahente og yuta, mamalit sab og yuta.
Sa pagkakaron, ilang gisubay ang kadtong batan-ong lalake kuyog ni Suico. / GPL