MOABOT sa kapin 600,000 ka indibidwal sa Central Visayas ang lakip sa pre-registration sa Philippine Identification System (PhilSys) o mas naila nga national ID.
Matod sa Philippine Statistics Authority (PSA) 7 nga nagsugod niadtong Lunes, Oktubre 12, ang pre-registration alang sa mga indibidwal nga unang makadawat sa maong national ID.
Lakip sa pilot areas sa nasod ang Cebu, Bohol, ug Negros Oriental diin anaa kini sumatotal 615,692 ang target alang sa pre-registration.
Sa maong gidaghanon, 224,293 niini ang labing daghan gikan sa lalawigan sa Bohol; 198,639 gikan sa Cebu; ug 192,760 gikan sa Negros Oriental.
Matod ni Noel Rafols, tigpamaba sa PSA 7, ang maong lista base kini sa Listahanan 3 sa Department of Social Welfare and Development (DSWD).
Ang team gikan sa PSA 7 mao ang mobisita sa mga napilian nga indibidwal aron mohimo sa pre-registration.
Ang maong mga indibidwal nga nalakip sa pre-registration mao kini ang household heads nga anaa sa low-income households.
Lukop nasod anaa sa 5 milyones ang target sa PSA sugod karong Oktubre.
Dugang ni Rafols nga aduna’y sumatotal 787 ka mga pre-registration team ang ipakatap sa rehiyon aron mohimo sa pre-registration.
Usa sa tumong sa PhilSys kining aduna’y valid proof of identity ang Filipino lakip na ang resident aliens sa nasod.
“To serve as the link in the promotion of social service delivery and strengthening of financial inclusion,” sumala sa tumong PSA sa national ID.
Subay niining pre-registration, sa Nobiyembre 25 na pagahimuon ang pormal nga rehistrasyon alang sa tanan diin diha na mahibaw-an kon ma-release na og sugod ang national ID ug kon i-abli na kini sa publiko. / HBL