PATAY ang usa ka 27-anyos nga dalaga human maligsi og trak sa ML Quezon Highway sa Barangay Pajo, dakbayan sa Lapu-Lapu, alas 10:30 sa buntag, kagahapon, Oktubre 16.
Nahitabo kini atubangan sa usa ka pension house nga duol sa dakong mall sa Barangay Pajo.
Ang biktima nailhang si Amandine Lapingcao, 27, molupyo sa Sitio Saac, Brgy. Buaya, Lapu-Lapu.
Si Lapingcao giingong padulong unta nga molabang sa karsada dihang naligsan sa usa ka Isuzu Giga trucktor nga gimaneho ni Ramil Alolod, 46, molopyo sa Puting Bato sa Negros Oriental.
Matod ni Police Captain Alcon Ecosura, ang OIC sa Police Station 3 sa Lapu-Lapu City Police Office (LCPO), nga base sa ilang imbestigasyon wala mabantayi ni Alolod nga adunay babaye sa iyang atubangan nga milabang samtang nagdagan ang gimaneho niini truck gikan sa Brgy Pusok paingon sa Brgy Pajo.
Human maligsi-patay dihadiha ang biktima samtang ang drayber gi-detain karon sa kapulisan diin gikatakda siyang mag-atubang og kasong reckless imprudence resulting homicide.
Sa pagkutlo ning balita wala pa usay nipatim-aw sa buhatan sa Police Station 3 nga kabanay sa biktima alang sa posibleng settlement sa hitabo.
Pahimangno ni Ecosura sa mga tawo nga magbantay gayud kon molabang sa karsada hilabi na kon dili sa pedestrian lane o ba kaha skywalk.
Mas maayo usab nga mag obserbar sa presensya sa mga traffic enforcer sa palibot aron magiyahan sa paglabang hilabi na kon ang lugar usa sa mga busy nga karsada sa dakbayan.
“Ang biktima nisuway og labang sa island sa lugar wala mogamit sa pedestrian lane mao to naapike siguro pagsaka niya sa island samtang go na mao naigo gyud siya sa truck. Delikado gyud nang in-ana kay kanang dagkong truck dili gyud na kakita nga naay tawo sa kilid o atubangan nila,” pagpasabot ni Ecosura sa Superbalita Cebu. / GCM