ANG Inter-Agency Task Force for the Management of Emerging Infectious Diseases (IATF-EID) sa Huwebes, Oktubre 15, 2020, niuyon sa adjustment sa stay-at-home restrictions nga gibase sa edad.
Mga tawo nga nanag-edad og 15-65 anyos gitugtan nang mogawas. Ang mga local government unit (LGU) mahimong mopatuman og mas taas nga age limit alang sa minors, depende sa kahimtang sa Covid-19 sa ilang tagsa ka jurisdictions.
Ubos sa Resolution No. 79, ang IATF ni-update usab sa listahan sa mga authorized persons outside their residence (APOR) nga naglakip na sa nanguli o gipapauli nga overseas Filipino workers ug mga Pinoy nga nanguli sa ilang tagsa ka mga dapit nga gigikanan ug mga tawo nga gipapauli pinaagi sa paninguha sa nasudnog kagamhanan human makatuman sa gikinahanglang quarantine protocol nga giuyonan sa modawat nga LGU.
MOTUMAN
Sundon ni Mayor Edgardo Labella ang bag-ong pahibawo sa Malacañang nga mahimo nang makagawas sa ilang pinuy-anan ang nag-edad og 15 hangtod 65 anyos.
Apan makagawas lang sila kon makaisyu na og bag-ong executive order ang mayor nga mag-amendar sa unang EO nga iyang giisyu nga posibleng luwatan karong adlawa, Oktubre 17, 2020.
“I will abide by the pronouncement of Malaçañang on the latest development especially allowing those minors and senior citizens. And I will issue the corresponding executive order, probably tomorrow,” padayag ni Labella.
Pahimangno sa mayor nga makagawas lang ang mga batan-on ug senior citizens nga nasulod sa maong age bracket kon aduna silay quarantine pass nga giisyu sa City Hall.
Si Labella nagkanayon nga niining nagkaluag nga guidelines gikan sa IATF dinhi sa Sugbo, iyang ipadayon nga border control checkpoints para masiguro ang kaluwasan sa mga tawo ug makontrolar ang magsuroysuroy nga way tumong.
Ang Probe nga gipangulohan ni Raquel Arce, Cebu City Police Office ug barangay volunteers maoy manakop sa mga tawo nga mogawas nga way quarantine pass ug kadtong di mosunod sa minimum health protocol.
NALIPAY
Gihangop ni Lapu-Lapu City Mayor Junard “Ahong” Chan ang desisyon sa IATF.
Kini gumikan kay mas di na unya komplikado ang pagpatuman sa health ug quarantine protocol sa mga hotel resort sa dakbayan kalabot sa ilang mga guest.
Si Chan una na untang nihangyo sa IATF nga tugotan ang mga senior citizen ug menor de edad nga makauban sa ilang mga pamilya nga ganahan mo check-in sa mga resort ug hotel sa dakbayan nunot sa pagbukas sa turismo.
Gumikan kay iyang nakita nga ang pag check in sa mga hotel ug resorts sa dakbayan usa ka family affair.
Ang pagdili sa mga senior citizen ug menor maoy nakahatag og gamayng kalibog sa mga nanag-iya og hotel ug resort kalabot sa ilang pagdawat og guests.
Gipadayag hinuon ni Chan nga mas maayong pangitaan gihapon og quarantine pass ang mga senior citizen ug menor de edad kon mogawas aron makontrolar ang ilang paggawas.
Kadto lang senior citizen ug menor nga uban sa ilang pamilya nga nagpa book sa hotel ug resort sa dakbayan ang dili kinahanglan og Q pass.
“Mas maayo naa gihapon Q pass kay para dili magdungan og gawas kay magdasok nasad. Unya manggawas tanan like karon zero cases ba ra ba gyud ta permi sa atoa (sa Lapu-Lapu),” matod ni Chan.
GIHANGOP
Bisan si Mandaue City Mayor Jonas Cortes nalipay ug nihangop sa hukom sa IATF.
“We welcome this announcement by the Malacañang as it is the reality of how we are managing the COVID-19 pandemic. At the end of the day it is really not about who or what activities are allowed, but whether the people have the discipline to follow the prescribed guidelines and the will to cooperate with the government’s effort. That is why we call our action as “Bayanihan” because it requires everyone’s help and participation,” matod sa pamayag sa mayor nga gipadala sa Superbalita Cebu. / PAC, GCM, KFD