GIAPROBAHAN sa Inter-Agency Task Force for the Management of Emerging Infectious Diseases (IATF) ang pagpahigayon og sabong o cockfighting sa mga dapit nga ubos sa modified general community quarantine (MGCQ).
Hinuon, ang local government units, sa gihapon, adunay gahom kon ila ba kining tugotan nga makabalik na sa ilang operasyon ang mga lisensiyadong buwangan ug tari-an sa ilang tagsa-tagsa ka mga lokalidad.
Ang pagtugot sa sabong o cockfighting, sama sa uban, mosubay sa mga lagda nga gihan-ay sa gobiyerno. Way audience, way sugal, ug ang pagpasalida niini nagkinahanglan og permiso gikan sa IATF.
Taliwala niining pagtugot, ang Philippine National Police mibutyag nga ipadayon gihapon nila ang subsob nga operation batok sa mga illegal nga cockfighting, lakip na niini ang pagpahigayon sa online.
“We would like to remind the public that this kind of operation is illegal. We urge the operators and the players to wait for additional time for the release of the IATF Guideline on cockfighting operation before engaging in any activity,” matod ni PLt. Gen. Guillermo Eleazar, ang commander sa Joint Task Force COVID Shield.
Si Games and Amusements Board chairman Baham Mitra mihangop sa maong kalambuan.
“Our gratitude also to the cockfight operators, breeders assoc, our congressmen sympathetic to the industry, agri vet companies, media, and others who have one way or another helped push for the resumption,” padayag ni Mitra.
Ang pagtugot gipirmahan nila ni Karlo Nograles, co-chairperson sa IATF ug Secretary Delfin Lorenzana sa Department of National Defense.
Apan sa dakbayan sa Sugbo gikataho nga dili mosugot si Mayor Edgardo Labella nga ibalik ang operation sa sabong.
Hinuon, wa ma contact si Labella dihang kompirmahon unta kini. Si Jay Li, presidente sa Visayas Gamefowl Breeders Association (Vigba), nipadayag sa iyang kasubo sa dihang iyang nasayran pinaagi sa social media ang desisyon ni Labella.
“Luoy kaayo ang cockfighting aficionados sa Cebu City. Dako na kaayo og alkanse ang mga breeder. Unya daghan kaayong nanginabuhi sa sabong. I think wala may problema kay mosunod man ta sa protocol. Hinaot nga ikonsiderar lang unta na,” matod ni Li sa dihang gikahinabi sa Superbalita.
“Nangandam na unta mi pagkahibawo namo nga ni okey na ang IATF. Manawag na unta mi sa among mga miyembro para sa among mga activities. Pero na surprise mi kay gi-post man nga dili mosugot ang mayor. So, hopefully i reconsider lang unta ni Mayor,” dugang ni Li. Ang Vigba adunay kapin sa 100 ka mga sakop.
Si Bebot Monsanto sa Gallera de Mandaue mipadayag sa ilang kaandam sa higayon nga hingpit nang mahibalik ang sabong.
Siya nagtuo nga uyon ang pamunoan sa Mandaue City sa pagbalik sa operasyon sa sabong. Apan matod niya nga andam silang mosunod sa mga lagda sa IATF.
“Mosunod gyud mi sa mga protocol. Kon moingon nga 50 percent ra ang pasudlon way problema. Kon unsay mga health protocols amo gyud sundon.
Kon kahinumdoman, mokabat na ngadto sa pito ka buwan kapin nga gisuspenso ang pagpahigayon og sabong sa tibuok nasod nga nakaapekto sa panginabuhi sa liboan ka mga individual.
“My call to sabungeros is let’s be safe and follow the strict health and safety protocols provided by the IATF and the DILG. This is proof that the Philippines is back on Its feet again,” dugang ni Mitra.