NAGBAGULBOL akong langyaw nga amigo nga si John (tinuod ngalan gitago) kay diyot-diyot motawag og mangayo og kuwarta ang iyang kanhing hinigugma nga iyang napaangkan.
Feeling niya gigamit ra siya nga murag human ATM sa babaye kay wa man gihapon kini naningkamot pagpangita og trabaho bisag human na kini niya gipaeskwela. Matod pa niya ‘I am her human ATM’ kay samtang nabulos siya og trabaho, ang babaye nag-sitting pretty ra og huwat kon anus-a mo luwa og kwarta ang iyang human ATM.
Maka-uwaw paminawon ang ingon ining bagolgol sa langyaw kay abe pa lang mga tamaran ug nawong og kwarta kitang mga Pinay.
Diay akong mga sugyot aron di kaayo madak-an sa mga gastuhanan ug maka-ipon sab bisag ginagmay labi na karong panahon sa Covid-19 nga way klaro ang trabaho unya mahal ang mga palaliton.
Ari ta una sa mga cellphones (cp). Ayaw una pagsegi og palit o ilis anang uso ug mahalon nga cp kay kusog kaayo ang paghimo o upgrade sa mga bag-ong versions. Wa pa gali ka ka-impas sa imong binuwang pagbayad, naa na say bag-ong version nga moabot nga daghan og nindot nga features.
Sunod kining mga mahalon ug branded nga bags. Daghan biya kaayong mga replica o emitasyon nga susama ra og hitsura sa orihinal apan barato total di bitaw ka sukit-sukiton sa motan-aw kung naa ba kini tikita nga magpakita nga kini orihinal.
Ayaw sab pagsegi og palit og mahalong sinena ug sapatos total di mana makita ang gamay nga ‘tag’ sa presyo ug brand nga naa sa luyo. Pilia hinuon ang sinena nga ma bagay ug ma angay sa porma sa imong lawas kay di ma na sa sinena kundili sa pagdala sa nagsul-ob.
Ayaw sab og pagsige og palit anang underwear nga mahalon ug branded total ipa-ilalom ma na inig sul-ob nimo.
Ayaw sab pagtukod og ala mansyon o palasyo nga balay kay inig ka dagko sa mga bata, maglain man gihapon na unya ikaw na lang og ang imong pares ang mahabilin. Ang dakong balay, dako sab og limpyuhanan og taas og maintenance.
Wais na si misis, buy onetake one na ang uso.