SUPERBALITA CEBU

BIR-Ormoc balik na sa operasyon

ORMOC CITY, Leyte -- Balik na sa ilang operasyon ang Bureau of Internal Revenue (BIR) district office sa Ormoc City.

Nahuman na sa ilang mandatory nga quarantine ang kapin kun kulang 60 ka mga empleyado niini ug nag negatibo usab sa RT-PCR test ang ilang revenue district officer.

Ang BIR-Ormoc gipa-lockdown sa ilang regional office kahuman usa ka babaye niini nga empleyado ang nag positibo sa coronavirus.

Ang empleyado niuli sa ilaha sa Maasin City, Southern Leyte niadtong Septiyembre 24 ug nibalik sa Ormoc pagka Septiyembre 28.

Nigawas ang mild symptoms sa babaye pagka Oktubre 1 sa dihang padulong na siya mo uli sa Maasin kauban ang ilang revenue district officer sakay sa usa ka pribadong sakyanan.

Gikuhaan og swab sample sa Maasin ang babaye pagka Oktubre 7 ug nigawas ang resulta nga positibo pagka Oktubre 8.

Si Dr. Larsen Omolon, Adult Infectious Diseases specialist, nirekomendar nga pwede ra og dili kuhaan og swab samples ang kadtong mga kauban sa babaye.

Una nga rason ni Omolon, Oktubre 1 nigawas ang sintomas sa babaye nga na-infected sa Covid-19.

Ang pagpanakod sa usa ka positibo nga pasyente magsugod og mga duha o tulo ka adlaw sa wala pa mo gawas ang sintomas hantud lima o unom ka adlaw kahuman nigawas ang sintomas, mao nga Oktubre 1 hantud sa Oktubre 6 dapat nakuhaan og swab samples ang mga kauban niini nga posible na-exposed gikan Septiyembre 28 hantud Oktubre 1 kung kanus-a mi-report ang babaye sa trabaho.

Pero nahibaw-an nga naay Covid ang babaye pagka Oktubre 8 na ug nilapas na kini sa pito ka adlaw gikan sa pinakauwahi nga exposure kaniya sa iyang mga kauban.

Ikaduhang rason ni Omolon, base sa daghang pagtuon, ang incubation period sa Covid naa sa duha ngadto sa katorse ka adlaw hinungdan nga naay mandatory 14 days nga strict quarantine or isolation sa mga confirmed, suspected ug exposed sa Covid-19.

Sulod sa 14 ka adlaw, kung naay mo gawas nga sintomas pwede kini kuhaan og swab sample. Pero ang mga kauban sa babaye walay bisan usa ang nagpakita og sintomas.

Ikatulo nga rason, ang triaging ug pag-allocate sa mga kagamitan importante kaayo panahon sa pandemya. Pasabot niini, limitado ra sab ang mga testing kits ug prayoridad lang niini kadtong mga naay sintomas nga delikado makatakud sa virus kumpara sa mga walay sintomas.

Katapusang rason ni Omolon, ang time-based approach sama sa gihimo karon sa mga empleyado sa BIR mao sab ang giendorso sa World Health Organization (WHO) ug Department of Health (DOH) ngadto sa mildly symptomatic ug asymptomatic.

Usa sa mga inila nga doktor nga si Dr. Rhodette Arevalo, miuyon sab sa mga rason ni Dr. Omolon.

Matod ni Arevalo, importante gyod ang strikto nga pag quarantine kay bisan pa og i-swab ang pasyente ug mag negative kini sa Covid-19, dili kini 100 percent assurance nga wala gyud siya mainfected.

Naay gitawag nga false negative sa swab test ug ang accuracy mag depende sa daghan nga factors, usa niini ang timing sa pag swab.

Mao nga strikto nga 14 days quarantine ug pagtuman sa ubang health protocols ang atong hatagan ug importansiya.

"Kung i-release dayun ang exposed person bisan wala pa nahuman ang 14 days nga quarantine tungod kay negative ang iyang swab test, naa gihapon ni posibilidad nga makatakod, mao nga strikto nga 14 days quarantine ug pagtuman sa health protocols ang ato hatagan og importansya" pasabot ni Arevalo

Matod ni Jester Zacarias, spokesperson sa Ormoc City Health Office, nakahuman na sa ilang quarantine ang mga empleyado sa BIR apil na ang ilang mga pamilya ug kadtong mga naay transaksyon sa BIR gikan Oktubre 5 hantud 8.

Walay bisan usa nila ang nagpakita og sintomas sa Covid-19.

Sa dihang gi-lockdown ang BIR, si Mayor Richard Gomez nihatag sa iyang suporta pinaagi sa pag mando sa city health nga ipa-disinfect ang opisina kada adlaw.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!