PAMPANGA

Garcia: Rirya at Pamanganyaya (Envy and Betrayal)

Kapisik

“Makanyan man ing kapagnasan ning Ginu

yang lumaso kaya at maging sangkan king pamagdusa na;

at agya mang ing Ginu gagawan nang daun ing bye na para king kasalanan,

akit na la ring keyang dai at ikaba Na la ring aldo na,

at ing kapagnasan ning Ginu misaplala king gamat na.”

~ Isayas Dangka 53: Sunis 10

(Isaiah 53:10)

“Pauli ning nung patawaran mu la ding aliwang tau nung mikasala la keka,

ing makabanwa mung Ibpa patawaran na Na ka naman.

Dapot nung e mu la patawaran ding aliwa karing sala da,

ing Ibpa mu e na ka naman patawaran.”

~ Mateu Dangka 6: Sunis 14-15

(Matthew 6: 14-15)

“Daptan mu ing pekamayap mu bang iyampang ing sarili mu

king Ginu anting inayunan ning metung,

Ing talagawa a e kaylangan dumine

at makatud nang tatalnan ing amanu ning katutwan.”

~ Kadwang Aklat nang Timoteu ? Dangka 2: Sunis 15

(2 Timothy 2:15)

“Pakalaman Ko ring pakalaman mu,

at ninu man ing misusumpa keka isumpa Ku;

at ding sablang tau king yatu

mikalam la pauli mu.”

~ Kamumulan Dangka 12: Sunis 3

(Genesis 12:3)

“Ing e tutung saksi e ya malyaring e miparusan,

at ninu mang misasalbag kalaraman e ya lumaya.”

~ Diparan Dangka 19 : Sunis 5

(Proverbs 19:5)

“Ding kamaganak mu, kayagum ning sarili mung palipi—

agyang ila penganyaya da ka;

ginulisak lang masikan laban keka;

E mu la panaligan,

agya mang magsalita lang mayap keka.”

~ Yeremyas Dangka 12: Sunis 6

(Jeremiah 12:6)

***

Pamanganyaya, manibat king pamagimbut king ala king manganyaya. Uyat na niti ing pamangalalu o rirya. Buri ning mapanganyayang tau atin ya mu naman karing nung nanu ing atin la ring aliwa. Mekad kakaluguran na o kapatad o agyang e na nanu balang dapot atin yang bage-bage a ya buri na dapot e na akwa king nanu mang sangkan.

Deng mapangarirya mekad mabandi na la dapot uli ning kasakiman da–buri da atin la ngan karing sablang pibandyan, upaya, kebantugan at sentingan o legwan. Neng malagad la mu reng ati lu ngan karela deng apat a bage deta–ing mapangarirya sasakit ya lub–inya pin agagawa nang ipanganyaya na la ding para nang tau–kapatad na man, kakaluguran o ninu mang pangariryan na.

Deng mapanganyayang tau manyaksak lang pagulut agya mang keng arapan asno kaganaka keka at mekad pupuryan da ka pa ba’mung apapanwala da kang ila mayap la keka. Kayarap mu la e mu akit ing pamangarirya da at pamalak dang pamanganyaya keka uling e mo arakap mata at e la milawe matulid keka uling e da buring akit mu ing pilubluban dang sukab.

E la lalaban patas deng mapanganyayang at ing kasukaban da abalu mu namu kabud dandaman mung penganyaya da na ka uling pane kasiran mu ing daraptan da.

Mengari lang ubingan a makapampan king dikut deng mapanganyayang lilu uling manuktuk la potang e mu piyadyan.

***

Dake Talabaldugan:

1. lupasáy (panguri) lupase, makalupase, makatalungku, makatimpu. English - fallen or sitting flat on one’s haunches. Alimbawa king pamangamit: “Disnan mi yang lupase ing matwang magtinda at bala mi sa’makagising ya dapot mipatudtud ya pala keng pagal at puyat.”

2. lupaypáy (panguri) lupepe/makalupepe, makabalag gamat, bitis at makaduku keng keynan o pagal. English - having fallen or drooping limbs or wings due to weakness. Alimbawa king pamangamit: “Dintang yang lupepe ing pangane nang Pentung kaybat nang megaral uli kanung alang metung man kareng kayabe na king pipagaralan linub nung e mu yang dili.”

3. lupî (panguri) lunu, malambut at maimpis balat. English - molting, decorticate, doff, exuviate, peel, slough, cast off, pull off, take off. Alimbawa king pamangamit: “Lunu la pa ding ebun a apulut da keng dayat deng anak dapot pepalutu da la kayuli da uling asno kanu karanup.”

4. lupíg (panguri) melupig, supil/mesupil, saul/mesaul, sambut/mesambut, daig/medaig. English - vanquished, subjugated, conquered, lost, trounced, annihilated, defeated, beaten, overthrown, surpassed. Alimbawa king pamangamit: “Nung menyambut la man di Tyagu kareng kalaban da napun, lupig no man kareng bayung akalaban da nanding abak.”

***

SADYANG GAWI DA RENG KAPAMPANGAN

Deng Kapampangan, lalu na reng kareng liblib o mangarayung baranggay lakwas na kareng danuman at marangle, gawi da ing makatimpu o makalupase neng atin lang panayan at ati lu keng dalan o nung ala la mung gagawan. Maralas pa kakawlan do reng intud da. Deng namang mangatwa babawalan da la reng makatimpuat kakawlan da la reng intud da uli kanung magitika la nung antita. Gawing ating samut iriya iting malambat nang mekalingwan uling dela da na keng pamangalingwan deng mengayangu-bye mangatwang sadya darapat kareti.

Mekad inya mekalingwan na iti pauli ning dakal na lang saken agyang kareng liblib a baranggay inya e na la maynip manenaya ding taung bisang maglakbe at deng paynawa e dana gagawan iti uling lakwas da pang gawan ing timid-timid cellphone uling keraklan mag-FaceBook na la deng Kapampangan mabandi man at maluka.

Ay, kabilis mangayalilan ing bage-bage ngening kasalungsungan!

***

PIGAMPA: Ing Kapisik manalig yang misubling pasibayu ing lagablab ning legwan ning Kapampangan kapamilatan ning pamipasigla king keyang Kalinangan—ding keyang dalit, kawatasan, amlat at miyayaliwang kapaglalangan.

PARASAN: Pagnasan na niting ing paralan ning panyulat at sablang dake ning Kalinangan tamu a telukyan ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph