KARON nga new normal, padayon gihapon nga ma-entertain kanato ang Star Cinema ug karon may full length nga pelikula kita nga makita.
Pang-holloween treat kini nga horror film nga “U Turn” diin bida silang Kim Chiu, Tony Labrusca ug JM de Guzman.
Istorya kini sa usa ka journalist diin nahimong viral ang iyang istorya sa mga panghitabo dapit sa dalang kurbada o u-turn.
Gikan dinhi namatay ang kaluha ni Kim ug daghan pang mga kahibulongan ang kamatayon nga nahitabo sa u-turn.
Gumikan niini giimbistigahan sa dalaga ang maong insidente kauban ang iyang uyab nga si Tony Labrusca ug higala nga pulis nga si JM de Guzman.
Makauban usab nila dinhi silang Sky Quizon, Almira Mulach, Cris Villonco, Via Antonio, Mercedes Cabral, Cris Villanueva ug uban pa sa direksyon ni Derick Cabrido.
Mahibaw-an kaha nila ni Kim Chiu kon unsa gyud ang tinuod ug mapugngan ang mga maduguon pang panghitabo? Ay’g Saba!
* * *
Sa laing bahin dugay na diay kaayong fan si Kim Chiu ni Tony Labrusca, gani miangkon ang aktor nga nanuntan niya si Kim niadtong panahon nga dili pa kini artista ang dalaga.
Misamot ang iyang pagka-fan ug pagka-gustong makatrabaho ang dalaga niadtong nakauban niini ang bestfriend niining si Bella Padilla sa seryeng “Sino Ang May Sala.”
Unsaon nga way laing hisgotan sab dinhi ni Bella kon dili ang higala niyang si Kim.
Mao nga sobrang malipayon kaayo ang Tony nga sa unang horror ghost project niini leading lady niya ang gitawag nga “Millennial Horror Queen,” Ay’g Saba!
* * *
Janine Berdin nagparetoke sa iyang ilong, wala man sab kini gi-deny sa singer gani malipayon kining miangkon sa mga interbyu kaniya.
Nahimo lang siyang trending ug nag-viral pa labi na sa dihang nakita sa tanan ang iyang mga Instagram post.
Wala pay buwan excited na kaayong nag-post ang Janine sa iyang face ug kon inyong nakita ni guapa ug angayan sab kaayo ang dalaga.
Usa man gud diay kini sa iyang mga insecurities ang iyang ilong mao nga karon human sa maong operasyon dali-dali niyang gipakita ang resulta ug malipayon na kaayo ang dalaga.
Sa usa ka interbyu nga akong nakita diin gipangutana siya ni Vice Ganda kon unsa gyud ang iyang giparetoke?
Daghan man gud kaayong mga tsika nga dili lang ang iyang ilong apil na ang ubang parti sa iyang nawong.
Apan gikompirmar gyud sa singer nga ang iyang ilong ra gyud ang iyang gipa-enhance.
Sa maong interbyu usab gidayeg og maayo ni Vice si Janine ug sa nahimong resulta sa pagpa-usab sa iyang ilong, Ay’g Saba!