ARON di matugaw ang pagtuon sa mga tinun-an sa lungsod sa Santander, gimando ni Santander Mayor Marites Buscato ang pag-ban sa pag videoke sa lungsod matag weekdays.
Ang Executive Order 053-10-2020 maoy giluwatan ni Buscato nga sundon sa mga konstituente niini.
Usa sa concern sa mayor mao ang kasaba sa palibot kon may mag videoke ug tungod niini di na makatulin sa pag tuon ang mga tinun-an ilabi na kadtong may online classes ug nag answer sa modules.
Di pwede ang pag videoke sugod sa alas 8:00 sa buntag hangtod sa alas 5:00 sa hapon, gikan sa Lunes hangtod sa Biyernes.
Hinuon, gitugotan nga maka videoke matag Sabado ug Dominggo gikan sa alas 5:00 sa hapon hangtod sa alas 10:00 sa gabii.
Sa kondisyon nga kutob lang sa 90 ang labing kinakusgan nga volume niini ug kon mahimo pahinayan kini aron dili sab masamok ang mga nagpahuway.
Naglakip niini kadtong mga videoke sa gawas o sulod sa panimalay.
Ang maong kamandoan epektibo hangtod sa paglanat sa modified general community quarantine (MGCQ).
Aron masiguro nga sa maong mga oras way mag videoke, gitahasan sa mayor ang kapulisan, barangay tanod ug barangay kapitan sa pagpakatap sa impormasyon ug pag roving aron masiguro nga walay mosupak niini. (ANV)