SUPERBALITA CEBU

Ahong: sabong pwede; tigbakay dili

Lapu-Lapu City Mayor Junard “Ahong” Chan. (File photo)

ANDAM motuman si Lapu-Lapu City Mayor Junard “Ahong” Chan nga ablihan na pagbalik ang sabongan sa dakbayan basta rehistrado lang sa kagamhanan.

Apan giklaro ni Chan nga nalatid sa lagda sa Inter-Agency Task Force (IATF) nga sabong lang ang gitugotan, way labot ang tigbakay.

Alang kang Chan mas maayong ang sabong lang sa mga lehitimong cockpit arena ang tugotan gumikan kay posible nga matuman ang physical ug social distancing pinaagi sa pagbutang og barrier sa mga lingkuranan alang sa mga mamataday ug manan-away.

Butang nga lisod matuman sa tigbakay sanglit mahulog ra kini nga inato ug way klarong arena. Gibutyag sa mayor nga usa ra ka cockpit arena ang adunay lehitimong permit sa kagamhanan ug mao kini ang anaa sa Suba Masulog sa Barangay Basak.

Pasabot niini nga mao lang kini ang sabongan sa dakbayan nga mahimong maka operate og balik.

“Ug we’re talking sa tigbakay. Dili ni siya mao. separate ni siya kay wala ni lingkoranan o bleachers,” pagpasabot ni Chan.

MOTUMAN

Andam nga motuman ang kapulisan sa Central Visayas sa mando pagtugot na sa mga buwangan nga maka operate pagbalik. Matod ni Police Brigadier General Albert Ignatius Ferro, hepe sa Police Regional Office 7, nga magpedende kini sa hukom na unya sa mga local government unit sa rehiyon kon ila bang tugotan ang sabong sa mga legal cockfighting arena.

“It depends upon the local government kung mosugot sila, but for me its good to limit or restrict first the opening of the cockpit because it will somehow lessen the risk of being infected by the virus,” matod ni Ferro.

Iyang gipasabot nga samtang wa pay vaccine batok sa coronavirus disease (Covid-19) angay nga limitahan lang una ang kalihukan tungod kay usa kini sa hinungdan sa pagkatap. Duha na ka mga insidente nga mikatap ang virus tungod sa gipahigayong sabong sa nasud.

Kini nahitabo sa dakbayan sa Davao sa mga unang semana sa dihang mao pa ang pagsugod sa pagkatap sa Covid-19.

Laing hitabo sa San Juan City sa Luzon.

Daghan sa mga sugarol ang natakbuyan sa virus nga mitakod usab sa nagkadaiyang bahin sa Mindanao ug Luzon.

Matod ni Ferro nga dili siya makatugot nga mahitabo usab kini sa Central Visayas tungod lang sa pagtugot sa sabong sa mga buwangan.

“Remember on the first, kanang mga natakdan was in San Juan cockpit arena and then suddenly there was a cockfight in Davao and most were infected because of the cockfighting. So, I would rather comply with the local government initiative not to allow it for the moment... I think it is much better to not allow it first,” dugang ni Ferro.

Iya usab nga gipahibawo sa publiko sa Sugbo nga ang gitugotan lang sa IATF mao ang legal nga buwangan sa nasud apan ang mga tigbakayan sa kabarangayan hugot pa kining idili.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!