Coaster bus sa Suba naaksidente; 2 ang nagrabehan

DUHA ka mga kawani sa City Social Welfare Services (CSWS) sa Cebu City Hall nagrabihan human nabangga ang ilang gisakyan nga coaster bus samtang nagbahada sa Sitio C, Barangay, Cansomoroy, lungsod sa Balamban.

Sila Si Fidelito Montalban ug Oscar Vistal dali nga gidala sa tambalanan sa dakbayan sa Sugbo. Samtang gibuhian sa kapulisan ang driver nga si Delfin Dapiton, 47, taga Fulton Street, Barangay Lahug, Cebu City.

Ang bus dunay 24 ka sakay.

Ang driver minor lang og naangkong mga garas sa iyang lawas, lakip sa ubang pasahero.

Si SPO3 Benidecto Bobilles imbestigador sa Balamban Police Station nga nahinabi sa Superbalita Cebu, nagkanayon nga gibuhian nila si Dapiton human nga nagpailang head nga si Jade Tan nipadayag nga way nangreklamo batok sa driver.

Kon duna man gani, siya ang motubag niini o ang ilang buhatan.

Matod niya nga wa na nila maabti sa Balamban District Hospital sila si Montalban ug Vistal kay gidali sa pagdala sa tambalanan sa dakbayan sa Sugbo kay gikatahong dunay fracture.

Gibutyag ni Bobilles, nga ubay-ubay na ang mga sakyanan nga naaksidente sa maong dapit tungod sa pagkabahadaon sa karsada.

Ang maong dapit duol sa nadisgrasiyahan sa mga Iranian national nga daghang patay pipila na katuig ang milabay.

NANGHUWAM

Ang coaster bus sa Barangay Suba, Siyudad sa Sugbo gisakyan sa 24 ka mga kawani sa City Social Welfare Services (CSWS) sa Cebu City Hall nga mopaingon unta sa lungsod sa Tuburan.

Si Suba Barangay Captain Joel “Jojo” Sable nga nahinabi sa Superbalita Cebu niingon nga nanghuwam kanila ang buhatan sa CSWS.

Sa ilang kasabutan nga sila lang ang mopa gasolina.

Way abang ang paggamt tungod kay nagtrabaho ra usab sa gobiyerno apan mopahinungod lang sila sa drayber nga maoy naghatod kanila.

Dugang ni Sable nga ang mga kawani sa CSWS padulong sa lungsod sa Tuburan alang sa ilang usa ka adlaw ug usa ka gabie nga team bullding.

Sa ilang nauyonan nga ang coaster bus magpundo nalang didto samtang nagpaabot sa ilang pag-uli.

Nagpasalamat usab si Sable nga way nagrabihan nga mga sakay, ilabi na nga ang lugar nga dulhogon ug ang kilid pangpang na.

Si Dapiton, sa iyang bahin, niingon nga napalyar na ang brake samtang nagdulhog.

“Pag dulhog namo nibaga na ang brake. Kana bang nipalyar na, mura na gyud og wala na mogana ang brake.Pero wala lang ko magsaba kay basin og mangambak ba hinuon ang uban nakong pasahero, mas mosamot og kadelikado,” butyag ni Dapiton. (GPL, BBT)