Nganong magbaha sa N. Bacalso?

WA UNTAY baha sa Natalio Bacalso Avenue sa dakbayan sa Sugbo, duol sa Mambaling underpass, kon napatuman sa Department of Public Works and Highways (DPWH) ang P16.7 million nga road-widening ug drainage system nga proyekto.

Matod ni DPWH Central Visayas Director Edgar Tabacon nga maglisod sila og implementar sa proyekto tungod sa problema sa road-right-of-way (RROW).

Gibutyag kini ni Tabacon sa iyang pagtambong sa regular session sa Cebu City Council niadtong Oktubre 14, 2020, adlaw human nakasinati ang Dakbayan sa Sugbo og grabi nga pagbaha.

Ang P16.7 milyones nga road-widening project nga adunay drainage system makapalapad og 420-meters sa mga karsada karon.

NAPUTOL DIAY?

Matod ni Tabacon nga ang drainage sa lugar naputol tungod sa Mambaling underpass maong magbaha sa lugar.

“Ang atong drainage diha karon kay nawa baya pagbutang sa tunnel, Pagbutang sa tunnel, na-cut off man na diha,” segun ni Tabacon.

“Mao nang magbutang ta’g another drainage sa widening kay mag-widen man ta diha sa service road. But then, due to the right of way problem, wala siya ma-implement mao nang karon nag-flooding,” matod niya.

Sa mga niagi nga balita, adunay P15 milyones nga road-widening project with drainage system nga iimplementar unta nga mag-una sa Mambaling underpass.

Apan wa kini mapatuman kay na-terminate tungod kay uwahi nakapagawas og writ of possession ang korte.

Sa pagkakaron, ang DPWH nakakuha na og writ of possession sa 80 ka mga properties sa lugar.

Sa pagkakaron, adunay mga short term plans nga ginaimplementar ang DPWH apil na ang mobilization sa DPWH mobile water pump equipment; regular desilting sa existing drainage lines; increase sa inlet ug conduit areas sa mga existing drainage system; additional pipeline para sa run-off disposal directed to the underpass sump pit; ug reconstruction sa existing drainage line.

Si Vice Mayor Michael Rama gusto nga masulbad sa dali nga panahon ang problema sa lugar tungod kay ting-uwan na karon.

Nikwestyon sad si Konsehal Eduardo Rama Jr. kon aduna bay feasibility study nga gibuhat sa lugar sa wa pa gisugdan ang underpass nga proyekto.

Si Rama nangita usab sa “cistern the size of 10 Olympic swimming pools” nga iinstalar ubos sa underpass nga matod niya, gianunsyo ni South District Representative Rodrigo Abellanosa kaniadto.

“Wasn’t this supposed to be a smart tunnel adopted from Kuala Lumpur and the pilot for other similar projects?,” pangutana sa konsehal.

Giklaro ni Tabacon nga adunay catching pond sa underpass, apan dili kini pareha kadak-a sa olympic pool.

“So for the record, Mr. Chairman, kani nga project, sipyat ni sa pagsugod palang daan,” tubag ni Rama.

Matod ni Abellanosa nga wa mabahaan ang sud sa underpass ug ang baha sa kilid nga mga karsada kay “happens naturally during heavy rains.”

Matod sab ni Abellanosa nga naglain siya kanunay og P5 million nga budget para sa mga urban barangays sa south para sa mga drainage projects.

Mobalik pa og presentar sa konseho ang mga opisyales sa DPWH sa sunod nga session.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph