NATAPOS ra gayod ang kagulyang sa atong balay balaoranan nga ang bugtong kaakuhan mao ang pagpanday og mga balaodnon alang kanatong tanan, apan, nagkagubot sa dihang ang usa kanila giingong wala mituman sa ilang gilagdaan nga kasabutan labot term-sharing.
Alegasyo ni Alan Peter Cayetano misunderstood daw, gipaka-ingon daw niya og ang gusto kuno sa atong presidente iuswag ngadto sa bulan sa Disyembre ang turnover kay tapuson una ang General Appropriation Bill 7727 (GAB) sa 2021 budget.
Pero kon atoa gyung tumbukon ang nagpaluyo niini, mao nga gusto ni Cayetano, una siya manaug plansado na ang budget, kon pila ang pahat sa iyang distrito, tungod kay kon speaker ka, ikaw ang magbuot kon pilay imong i-budget sa imong distrito, ug mas labaw usab sa gidak-on sa budget ang imong mga kaalyado.
Sa dihang nakita ni Cayetano nga hinayhinay mitabok ngadto kang Lord Allan Velasco ang iyang mga kaalyado, didto pa siya misinggit og irrevocable resignation, kay gilamoy naman sa bag-ong House of Lord ang iyang gisaligan nga bugtong paagi nga magpabilin siya nga speaker.
Tanang mga nasud sa kalibutan, pulos gidumala og mga politiko, pero, ang politika sa ila gamiton lang panahon sa pamolitika, pero, dinhi sa ato sa Pilipinas bisag dili pa panahon kanunay nangibabaw ang kalihokang politika, ang interest sa katawhan nga labaw’ng nagkinahanglan, kanunay’ng anaa likod sa ilang pamolitika.
Adunay mga suod natong mga amigo, ang uban meritero na sa natad sa politika, sa panahon nga mag-abot kami sa mga coffee shop, manggawas ang pipila ka pangutana, kon unsa daw kunoy katungod sa atong mayor sa Davao nga manghilabot man daw kuno sa kalihukan sa Kongreso? Nga mayor man lang siya sa Davao? Tungod kay kon kinsay iyang paburan, sigurado raba gyod nga matuman.
Una, sa dihang gisaway siya ni Pantaleon Alvarez nga nagtukod daw og oposisyon political party ang atong mayor ang Hugpong nang Pagbabago (HNP), ug sa dihang nakigtagbo ang atong mayor sa pipila ka miyembro sa Kongreso, tanggal si Alvarez pagka speaker.
Sa dihang miduol si Cayetano kang Congressman Paolo “Pulong” Duterte, walay nahitabo, pero, sa dihang si Mayor Sara ang giduol ni Velasco, walay ra’y 24 oras, lagpot si Cayetano pagka speaker sa 18th Congress.
Politika ang anaa sa likod, mao kana ang tukmang mensahe, hayag pa sa udtong tutok ang signal niining tanan, siyento-por-siyento sa 2022 presidente ang daganan sa atong mayor sa dakbayan sa Davao.
Kini maoy akong tubag sa pipila ka pangutana sa atong mga amigong mi-retiro na sa natad sa politika, may panultihon nga nagkanayon, “Action speaks louder than voice”, lihok ang panid-i, ayaw ang iyang isulti.
Kay mao usab kana’y istelo sa iyang amahan sa pamolitika sa dihang nahimo natong mayor sa Davao sulod sa 22 ka tuig. Kon ang pangutana si Mayor Sara ba maoy sunod natong presidente sa 2022? Kon sa Davao lang yes, pero lang, ang Davao dili mao ang Pilipinas. Mga katawhan sa Pilipinas mao ang maghukom.