HANGTUD Disyembre 31, 2020 pa ang 7 p.m. to 5 a.m. curfew sa Davao City, butang nga kon isipon, minghoy ang pag-selebrar sa Pasko ug Bag-ong Tuig.
Kini ang miguwa sa hunahuna sa mga Dabawenyo gumikan di mapasadya ang maong mga okasyon. Unang tuig kini nga nahitabo, gumikan sa pandemya.
Migula ang hukom sa bag-ong oras sa curfew sa Davao City human misutoy ang pagtaas sa kaso sa coronavirus disease (Covid-19), diin sa Davao Region, ang Davao City ang dunay pinakadaghang natakbuyan sa virus matag adlaw.
Gilayong mihukom si Davao City Mayor Sara Duterte-Carpio sa maong pagpatuman isip maoy ulo sa Inter-Agency Task Force (IATF) ning rehiyon subay sa rekomendasyon sa mga doktor nga kinahanglan sa maong remedyo.
Daw nabalik og kulong ang mga tawo una paman modangat ang alas 7 sa gabii. Magdali gyud ang katawhan nga makabalik na sa ilang panimalay una paman ang maong takna.
Kon naguol kay di ma-enjoy ang Pasko ug Bag-ong Tuig, mas guol kon mahitabo nga daghan ang mataptan sa virus.
Mamahimong maselebrar nga magsadya uban ang pamilya, apan naa lamang sud sa balay, di mogawas, di makig-kauban sa mga silingan sa maong takna, gumikan usa sa ikonsidera ning taknaa aron malikayan ang local transmission mao ang pagbutang sa hunahuna nga ang matag usa, nagpositibo sa Covid.
“Threat your companion as positive,” giingon sa Department of Health aron magpabilin sa hunahuna sa matag usa ang kahadlok ug maoy pamaagi nga maglikay sa pakigduol.
Di kabalak-an ang pagselebrar sa Pasko ug Bag-ong Tuig, maselebrar gihapon kini sa sadya nga paagi uban sa pamilya sud sa mga panimalay.
Ang pinaka-importante, kompleto ang pamilya ug luwas sa virus pinaagi sa pagtuman sa mga health protocols.