HUMAN nag-usa ka tuig ang nahitabong kusog nga linog niadtong Oktubre 16, 2019, nasugdan na gayud sa lokal nga gobyerno sa Magsaysay, Davao del Sur ang pag-ayo sa municipal hall.
Sumala ni Mayor Arthur Davin nga dako ang ilang pasalamat kang Senador Bong Go human nagahinan na sa Department of Budget and Management og kantidad P25-milyones ang pagpaayo istruktura.
Hangtud karon, lab-as gihapon sa panumduman sa mga katawhan sa lugar ang sagunsong linog sumad niining buwan sa Oktubre gumikan kay daghang kabalayan sa mga barangay ang nangaguba.
Nikalas sab kini og tulo ka kinabuhi, pagkaangol sa daghang mga tawo ug pagkahugmak sa mga gambalay, lakip na ang municipal hall.
Apan sumala ni Davin nga luyo sa mga pagsulay nagpabiling lig-on ang ilang pagsalig nga makabangon gihapon.
Mismong ang mayor ang nangita og pamaagi nga makahatag gilayon og tabang sa mga apektadong katawhan hinungdan nga pipila na sab ang nahatagan og bag-ong pinuy-anan human nga gitutukan sa National Housing Authority (NHA) ang paghimo og mga balay.
Mas giuna sa lokal nga gobyerno ang pagplastar sa mga pamilyang namalhin sa mga tent sa matag evacuation center hinungdan nga naabtan pa og usa ka tuig ang rehabilitasyon sa ilang munisipyo.
Mapasalamaton sab mga opisyal ug katawhan sa lungsod human wa sila pasagdi ni Presidente Rodrigo Duterte mao nga paspas ang pagtukod og mga balay pinaagi sa NHA.
Sa kasamtangan wa na gitugtan nga mobalik pa ang mga tawo sa mga giingong peligrusong lugar sa kalamidad. (Orlando B. Dinoy)