ANG Los Angeles Clippers mikuha kang Tyronn Lue isip hulip kang Doc Rivers nga mihiwa sa team human sa ilang bati nga post-season performance didto sa Orlando, Estados Unidos.
Ang Clippers usa unta sa mga inilog apan napakyas sila sa pag-abanti sa NBA Finals human lupiga sa Denver Nuggets sa Western Conference Finals sulod sa pito ka duwa.
Naglabaw unta’g 3-1 sa series ang Clippers apan napilde sila sa uwahing tulo ka duwa.
Ang pagsulod ni Lue sa Clippers nagmarka og bag-ong hugna sa Clippers. Si Lue migiya sa Cleveland Cavaliers ug ni Lebron James sa NBA championship niadtong 2016.
Sa iyang coaching job, si Lue adunay 128-83 (win-loss) record sa regular season ug 41-20 sa playoffs.
Nahimo pud siya og kampiyon sa nagduwa pa kini sa Los Angeles Lakers kauban ang mga NBA greats nga sila Shaquille O’neal ug anhing Kobe Bryant.
Gibalita sa ESPN nga si Lue nakapirma na og lima ka tuig nga kontrata sa Clippers. Si Lue maoy gilauman nga mogiya sa Clippers stars nga si Kawhi Leonard ug Paul George.
Ang NBA champion ug ex-Detroit Piston nga si Chauncey Billups maoy usa sa kandidato nga mahimong assistant coach ni Lue. Ang Hollywood-rival sa Clippers nga Lakers maoy midaog sa NBA title sa miaging semana batok sa Miami Heat sulod sa unom ka duwa sa NBA Finals. (RSC)