MAS nadasig ang mga Filipino nga atleta sa desisyon sa host Vietnman nga iapil ang triathlon, jiujitsu, bowling ug esports sa mga duwa sa 31st Southeast Asian (SEA) Games sa sunod tuig.

Ang Pilipinas nga maoy nahimong overall champion sa 30th SEA Games didto sa Maynila sa Disyembre 2019, nakakuha og 149 ka gold medals, 117 ka silver ug 121 ka bronze.

Dakong parti sa medal tally sa Pilipinas nag gikan sa individual sports sama sa triathlon, jiujitsu ug esports.

Ang triathlon team nakabulsa og lima ka gold ug duha ka silver, ang jiu-jitsu adunay lima ka gold, tulo ka silver ug tulo ka bronze, samtang ang esports mitunol og tulo ka golds, usa ka silver ug usa ka bronze.

Gikalipay ni Philippine Olympic Committee (POC) president Rep. Abraham “Bambol” Tolentino ang pagkadugang sa maong upat ka events kay makatabang kini sa Pilipinas sa maong regional sporting meet.

Matod ni Tolentino, usa kini ka maayong balita kay gidominar man nato ang tulo sa upat ka sports nga gidugang sa Vietnam niadtong SEA Games 2019.

Ang 31st SEA Games duwaon didto sa Hanoi ug Ho Chi Minh Vietnam sa Nobyembre 21 ngadto sa Disyembre 2.

Si Tolentino nagplano nga iduso ang pag-apil sa baseball/softball, soft tennis, duathon, windsurfing ug wakeboarding. Ang maong mga events gidominar pud sa Pilipinas sa miaging tuig.

Ang nalakip na nga mga duwa mao ang aquatics, archery, athletics, badminton, basketball, billiards, bodybuilding, bowling, boxing, canoeing, chess, cycling, dancesports, esports, fencing ug football.

Anaa pud ang golf, gymnastics, handball, judo, jiujitsu, karate, kickboxing, kurash, muay thai, pencak silat, petanque, rowing, sepaktakraw, shooting, table tennis, taekwondo, tennis, triathlon, volleyball, vivinam, weightlifting, wrestling ug wushu. (RSC)