NIHIMO og kasaysayan si Teofimo Lopez isip pinakabatang boksidor nga nihupot og upat ka bakos isip lightweight champion sukad nga na natukod ang World Boxing Organization (WBO) niadtong 1988.
Sa edad nga 23-anyos nahimong undisputed lightweight world champion si Lopez human niya ilugi og bakos si Vasiliy Lomanchenko sa ilang away didto sa MGM Grand Conference Center sa Las Vegas kagahapon.
Human sa mainiton nga 12 ka hugna sa boksing, nagmadaogon si Lopez pinaagi unanimous decision nga 116-112, 119-109 ug 117-111 aron ma fully-unified ang lightweight nga titulo.
Nadala niya pagbalik ang iyang International Boxing Federation (IBF) nga bakos ug nakuha ang World Boxing Association (WBA), World Boxing Council (WBC) ug WBO nga titulo ni Lomanchencko.
Si Lopez (16-0, 12 KOs) mibuhi og jabs aron makontrolar ang mga lihok sa 32-anyos nga si Lomachenko (14-2, 10) para makapundo og puntos sa scorecards.
Gipakita ni Lopez nga mas paspas ug kusgan siya kang Lumanchenko.
“I had to dig deep, man,”’ matod ni Lopez. “I’m a fighter, I’ve got to dig in deep.”
Gitapos sa lumad nga taga Brooklyn, Estados Unidos nga si Lopez ang 13 ka sunod-sunod nga daog ni Lomanchenko, kinsa gikonsiderar nga usa sa kasamtangang Top 3 pound-for-pound nga boksidor.
Matod ni Lopez nga gilauman niya ang hinay ang sugod ni Lomanchenko kay tungod sa iyang 14-month lay-off ug iya kining gigamit aron makapundo sa mga unang hugna sa ilang duwa.
Si Lomachenko, kinsa napilde lamang kausa sa dul-an 400 ka amateur fight ug naa lay duha ka pilde sa iyang pro career, supak sa desisyon sa judges.
Para niya maayo ang iyang gipakita ug sukwahi kini sa gihatag nga iskor sa iyaha.
“I think the first half of the fight he got more rounds than I did but in the second half of the fight I took over,’’ batbat ni Lomachenko. “I was much better.’’
Ang maong away mao ang pinakadako sukad nagsugod ang pandemiya. Kay dili paman pwede motan-aw ang fans, gisalida kini sa ESPN.