GIAPROBAHAN niadtong Oktubre 15 sa Inter-Agency Task Force for the Management of Emerging Infectious Diseases (IATF-MEID) ang Resolution No. 79 nga nagtugot sa nagpanuigon gikan sa 15 anyos hangtod sa 65 anyos sa paggawas sa ilang balay.
Gihangop kini sa Hotel, Resort and Restaurant Association of Cebu (HRRAC). Si HRRAC president Carlo Suarez niingon nga makatabang kini sa pagbangon sa turismo sa Sugbo. “This will pave the way for our economy to bounce back,” matod niya.
Gilugakan sad ang stay-at-home limits sa mga senior ug sa mga menor de edad. Apan kinahanglan nga higpit gihapon ang pagpatuman sa health protocols kay tingalig mag-una og “bounce back” ang Covid-19 kay sa atong ekonomiya.
* * *
Nitibugsok ngadto sa 217 ang mga aktibong kaso sa Covid-19 sa siyudad sa Sugbo, samtang nisaka ngadto sa 44 sa 80 ka mga barangay sa siyudad ang “zero transmission” kon way aktibong kaso sa miaging 14 ka adlaw, nga natala niadtong Sabado, Oktubre 17.
Si Cebu City Councilor Joel Garganera, deputy chief sa Emergency Operations Center, niingon nga lakip niini ang mga bukirang barangay Buot, Paril, Sudlon 1 ug Taptap, nga wa gyu’y bisan usa ka kaso sa Covid-19 sukad sa pagsugod sa pandemic sa Marso.
Sumala sa Department of Health (DOH) 7, ang siyudad sa Sugbo adunay 10,158 ka mga konpirmadong kaso sa Covid-19, ang ang nangaayo niabot og 9,263 ug 678 patay.
* * *
Nagpadayon sa pagsaka ang mga kaso sa Covid-19 sa Estados Unidos ug sa Uropa, timailhan nga lisod puhagon ang coronavirus. Kinahanglang doble ang atong pag-amping kay nagsalig lang ta sa bakuna nga mamugna unya sa advanced countries.
Busa likayan gihapon ang pagdasok sa mga tawo. Ipadayon ang pagsul-ob og face mask, social distancing ug pagpanghugas sa mga kamot. Matod ra ba sa DOH, mokabat sa 7 milyones ka mga Pilipino ang di makapanghugas sa kamot kay way tubig ug sabon.
Apan makalabyog na ang atong senior citizens gikan sa 60 anyos ngadto sa 65 anyos.