SUPERBALITA CEBU

Bag-ong nakagawas sa prisohan, gipusil-patay

ORMOC City, Leyte - Gipusil-patay ang usa ka lalake nga bag-o lang nakagawas sa prisohan nga si Rand Kelvin Catingub, 35, usa ka negusyante ug taga Barangay Casilda, lungsod sa Merida, Leyte.

Ang pagpamusil nahitabo sa dayong pagsaka sa biktima sa ikaduhang andana sa Building A sa Ormoc City Public Market, pasado alas 6 sa gabii, niadtong Biyernes, Oktubre 16, 2020.

Alas 7:10 sa gabii, nakadawat ang Ormoc City Police Station 1 og tawag bahin sa nahitabo nga pagpamusil, dali nga miresponde ang kapulisan pinangulohan ni Police Major Reyanaldo Honrado.

Naabtan sa kapulisan ang biktima nga nagbuy-od ug naligo sa iyang kaugalingon nga dugo.

Base sa imbestigasyon, ang biktima naglakaw padung sa ikaduhang andana sa Building A sa dihang usa ka sakyanan ang kalit mihunong ug nikanaog ang mamumuno ug gipusil ang biktima.

Patay dihadiha si Catingub ug dali nga misibat sa wa matino nga direksyon ang mga responsable.

Nasayran nga ang biktima kanhi nabilanggo gumikan sa kaso sa ilegal nga drugas. Nakagawas kini pinaagi sa plea bargaining agreement.

Apan ang kapulisan di pa makasulti sa tinuod nga rason sa pagpusil patay. Padayun pa ang ilang gihimo nga imbestigasyon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph