ON-CALL ang mga pulis sa Mandaue City Police Office (MCPO) aron moabag sa mga Disaster Response Team sa dakbayan sa Mandaue kon aduna na usab mga grabeng pagbaha.
Sukad nisulod ang buwan sa Oktubre, nagsugod ang La Niña ug ang mga pag-uwan nakamugna sa grabeng pagbaha sa pipila ka mga barangay sa dakbayan sa Mandaue.
Matod ni PCol. Jonathan Abella, city director sa MCPO, gitahasan nila ang tanang kapulisan nga anaa sa ilang City Mobile Force Company (CMFC) nga moabag sa mga disaster response nga himuon sa City Disaster Risk Reduction and Management Office (CDRRMO).
Apan, wala pa masayod si Abella sa insaktong gidaghanon sa kapulisan sa CMFC.
Sigon ni Abella nga ang maong mga pulis maoy gi-train alang sa mga disaster response ug sa mga search and rescue.
Automatiko nga i-deploy ang maong mga pulis kon ugaling magkuwang sa tawo ang CDRRMO.
Matod sab ni Abella, andam ra sab ang ilang basic equipment sa pag-rescue sama sa life vest nga mamahimong ipagamit sa responders.
Giklaro ni Abella nga bisan pa og gagmay ra ang kalamidad nga mahitabo sa dakbayan, i-activate nila ang pag-deploy niining mga pulis.
Gikabalak-an nga ang La Niña phenomenin mapasamot tungod sa low pressure area (LPA) sa Luzon. (KFD)