SUPERBALITA CEBU

154 ka street children naluwas sa Probe team

MIABOT na og 154 ka mga libud-suroy ang hingpit nga naluwas sa mga sakop sa Prevention, Restoration, Order, Beautification and Enhancement (Probe) team niadtong Biyernes, Oktubre 16, atol sa gilusad nga one time big time, rescue operation uban ang kapulisan sa siyudad sa Sugbo.

Sa maong gidaghanon sa street dwellers, lima nalang ang nagpabilin sa halfway house, diin kasamtangan sila nga gipahimutang samtang nagpaabot sa ihatag nga tabang kanila.

Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO) nga kasagaran sa maong mga libud-suroy adunay kaugalingon nga balay sa siyudad sa Sugbo.

Gipili nila nga mamuyo sa daplin sa karsada nga duol sa simbahan dala ang ilang pamilya tungod kay adunay sinemana nga madawat sama sa relief goods.

“Anha sila mamuyo if you can see diha sa Santo Rosario kanang sa mga simbahan, anha sila because duna diay schedule nga mga panghatag dinha nga mga goods, that’s why nga anha sila mopuyo,” matod ni Parilla.

Gituyo nila nga diha sila mangatulog sa duol sa simbahan aron makauna sila sa linya kon magsugod na ang pagpanghatag sa hinabang.

Kadtong adunay mga panimay dinhi sa siyudad sa Sugbo, gimandoan sila sa kapulisan nga mobalik na sa ilang mga balay ug dili na mopuyo kilid sa karsada.

Samtang kadtong lima nga nagpabilin sa halfway house, mga locally stranded individual nga wala nay kapanginabuhian nga ikasuporta sa ilang pagkaon, ang gipaubos na sa proseso.

Gikan ang maong mga individual sa probinsya sa Sugbo ug ang uban gikan sa Mindanao ug Leyte nga nangabot sa siyudad aron manginabuhi.

Gipasusi na usab ang ilang kahimtang sa panglawas ug gitakda sila nga papaulion sa ilang tagsatagsa ka mga probinsya.

Silang tanan gipangkuhaan usab og swab test aron masayran kon wala bay usa kanila nga nataptan sa coronavirus disease 2019.

Giawhag usab nila ang mga simbahan nga ang ilang hinabang sa mga kabus nga pamilya ipaagi nalang sa Department of Social Welfare and Services (DSWS) alang sa insakto nga pagpang-apud-apod.

Adunay gihimong data base ang Probe team ug ang kapulisan aron kon mobalik pa ang maong mga libud-suroy diha sa kadalanan, mahimo na sila nga pasakaan og kaso.

Dugang ni Parilla nga magpadayon pa ang ilang rescue operations karong semanaha sanglit aduna pay daghang street dwellers sa dakbayan sa Sugbo nga wala pa nila mahatagi sa pagtagad.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!