HALOS tanang milenyals wala na nakaila sa mga bag-ong bayani sa atong nasud nga nakigbisog batok sa kagamhanan ni Presidente Ferdinand Edralin Marcos.
Hinuon, ilang nasayran sa kasaysayan nga nabuntog si Marcos pinaagi sa malinawon nga “People’s Power Revolution” niadtong 1986 nga gisalmutan sa nagkalainlaing sektor sa katilingban human sa kamatayon ni kanhi Senador Benigno “Ninoy” Aquino didto sa tarmac sa Manila International Airport niadtong 1983.
Hinuon, ang pagkamatay ni Aquino nipasamot lamang sa kasuko sa katawhan sa rehimen ni Marcos tungod kay niining panahona, halos tanang lugar sa Pilipinas nialsa na batok kanila. Usa na niini ang Davao City nga maoy nanguna sa mga protesta, rally, picket ug dinagko nga lakbay bayan nga nakapatay-og sa pamunuan ni Marcos.
Usa sa mga iladong lider nga nitumaw niining panahona mao si Alexander Lavisores Orcullo nga anak sa lungsod sa Padada, Davao del Sur. Ang iyang pangalan nahipatik na karon sa “Bantayog ng mga Bayani” sa kaulohan kauban sa libuan pang mga bag-ong bayani human sa Martial Law.
Usa siya ka banggiitang mamumulong, peryodista, magtutudlo sa ekonomiya sa Ateneo de Davao University ug kanhi kapitan sa Barangay Mandug ning dakbayan. Ikaduha siyang anak sa magtiayong Hugo Orcullo Sr. nga taga Argao, Cebu ug Restituta Lavisores.
Nahimo siyang lider sa oposisyon batok ni Marcos ug ang iyang hinagiban mao ang iyang malantip nga diskurso ug sulat isip peryodista batok sa martial law.
Natawo siya niadtong Oktubre 19, 1944, ug namatay sa iya mismong adlaw’ng natawhan sa Oktubre 19, 1984.
Kagahapon gihandom sa iyang pamilya ang iyang ika-74 nga pagkahimugso. Sa adlaw sa iyang kamatayon, nitambong pa kini og “Committee Hearing” sa Sangguniang Panlungsod sa Davao isip barangay captain sa Mandug aron mabutangan ug dike ang Davao river aron dili matumpag ang mga balay sa low-cost housing project sa Davao Development Foundation (DDF) nga iyang gidumalahan.
Wala niya panumbalinga ang tambag kaniya nga dili mouli sa Mandug tungod sa hadla sa iyang kinabuhi sa mga armadong grupo nga sakop kuno sa People’s Liberation Organization (PLO) nga iya sa Bangsamoro Army ubos ni Kumander Inggo nga suportado sa militar ni Marcos.
Human sa hearing, lulan sa iyang sakyanan nipalit silag cake ug ice cream aron isaulog ang iyang ika-38 nga adlawng natawhan. Kauban niya niining panahona ang iyang asawa nga si Nenita “Nenen” Roldan Orcullo, ug duha ka tuig nga anak nga si Merdeka Alexander “Soysoy.”
Nipauli na unta sila sa ilang pinuy-anan sa DDF Village sa dihang giharang sila sa mga armadong lalaki sa tiilan sa Km. 8, Tigatto ug gipagawas si Alex sa iyang sakyanan ug sa dihadiha dayon gipaarakan sa ilang dalang armas.
Mokabat og 13-16 ka bala ang nitusaktusak sa iyang lawas nga nisangpot sa iyang hinanaling kamatayon. Gihaya siya sulod sa tulo ka adlaw sa Assumption School of Davao sa dalang Cabaguio.
Sa adlaw sa iyang paglubong sa Davao Memorial Park, sobra 30,000 ang nikuyog sa iyang paglubong gawas sa libuan pa nga naghulat sa daplin sa kadalanan. Tungod niini gitawag siya nga “Ninoy Aquino” sa Davao.