Editoryal: Gikinahanglan ang giya sa ginikanan

NAKAPAKURAT sa netizens diha sa social media ang balita nga dunay duha ka batan-on ang naghikog sud sa usa ka adlaw sa Davao Region.

Subay kini sa natala sa kapulisan diin ang mga biktima mao ang 14-anyos nga babaye nga taga Montevista Davao de Oro, samtang ang laing usa mao ang 15-anyos nga lalaki nga taga Malita Davao Occidental.

Sa inisyal nga imbestigasyon sa duha ka istasyon sa kapulisan, ang 14-anyos nga babayeng biktima, giingong nagbulag sila sa iyang uyab, samtang ang 15-anyos nga lalaki giingnan sa inahan nga ipahuman na og answer ang module, wa kaagwanta ang bayong-bayong, naghikog.

Mikakak sab sa ilang komento ang netizens, gipamahid ngadto sa Department of Education (DepEd) ang hinungdan sa usa nga naghikog, kay lagi gumikan sa module. Sa patas nga pamaagi, di sab unta dayon mapuntarya sa DepEd gumikan kay lagi dunay module nga gihisgutan sa report sa kapulisan.

Lagmit sab nga nalisdan na ang bata, gipuga pa pag-ayo sa inahan nga ipahuman — naaburido nga miresulta na hinuon sa pagkutlo sa kinabuhi.

Sa laing bahin sa Montevista nga panghitabo, kon sayo lamang nagiyahan ang nahisgutan sa mga ginikanan niini lagmit nga di sab kini ang mahitabo. Di sab mamahay dayon ang ginikanan gumikan daghan og klase sa batasan ang gihambin karon sa kabatan-onan bunga niining moderno nga teknolohiya.

Niining maong mga panghitabo, ginikanan ang dunay dako kaayo nga papel sa pagbuntog og usa ka hawan ug haruhay nga dalan sa mga anak. Gikan pa sa gamay hangtud sa ilang paghingkod, gikinahanglan naa ang ginikanan sa pagsulti nga gipaagi sa mga pulong nga di ikahiubos sa bag-o nga henerasyon sa kabataan.

Hinaut nga pinaagi sa hitabo, makamata ang daghang ginikanan aron malikayan ang susama niini nga insidente.