MANAGLAHI ang gipaguwang guidelines sa mga lokal nga gobyerno sa Davao del Sur alang sa nagkaduol nga paghandom sa Kalag-Kalag sa Nobyembre 1 ug 2 ning kasamtangan tuig.
Human gipaguwa sa National Inter-agency Task Force on Covid-19 ang direktiba nga sirad-an ang mga sam-ang sa nasud gikan Oktubre 29 hangtud Nobyembre 4, nag-iyahay na sa pagpaguwa og direktiba ang mga lokal nga gobyerno.
Sa Sulop, Davao del Sur, gipasidan-an sa lokal nga gobyerno ang publiko nga abri ang ilang sementeryo gikan sa Oktubre 22 hangtud Oktubre 28.
Kon dili makabisita sa maong mga petsa, mahimo sab kining himuon gikan sa Nobyembre 5 hangtud sa petsa 11.
Apan, sa maong mga adlaw, limitado ngadto sa 30 minutos ang pagbisita sa matag indibidwal sa ilang mga minahal sa kinabuhi.
Gitugtan sa lokal nga gobyerno nga manglimpyo ang mga moadto sa lubnganan, mohalad og buwak ug kandila ug mag-ampo sa ilang mga minahal sa kinabuhi nga mitaliwan na sa laing kalibutan.
Kinahanglan sab nga motuman sa minimum health protocols ang matag usa aron malikay nga matakbuyan sa Covid-19.
Bisan giamyenda na sa National Covid-19 task force ang mga edad nga mahimong makagawas, di gihapon tugtan sa lokal nga gobyerno nga mogawas ang mga nag-edad og 21 anyos paubos ug 60 anyos pataas nga moadto sa sementeryo.
Mas hugot sab nga gidili ang pagdala og mga pagkaon, ilimnong makahubog ug uban pang aktibidad sa ilang sementeryo.
Sa datos sa Municipal Health Office, aduna’y walo ka suspek sa Covid-19 ang lungsod ug siyam nga kumpirmadong kaso diin usa na lang ang aktibo human nakarekober ang walo niini. (Orlando B. Dinoy)