PATAY ang usa ka kolektor sa pautang sa lending company ug samdan ang iyang kauban sa pagpamusil alas 10:15 sa buntag, Oktubre 18, sa probinsya sa Maguindanao.
Giila ang napatay nga si Nestor Rebelala, 21, ulitawo, samtang samaron ang iyang kauban nga si Reno Kaha.
Matud ni Maguindanao Police Provincial Director Colonel Donald Madamba nga samtang sakay sa motorsiklo ang mga biktima sa Barangay Limpongo, Datu Hoffer Ampatuan, Maguindanao, kalit lamang mibutho ang duha ka wala mailhing tawo ug gipamusil sila gamit ang kalibre .45 nga pistola.
Miikyas sab dayon ang mga suspetsado dala ang motorsiklo, kuwarta nga koleksyon sa mga biktima ug personal nilang mga kagamitan.
Dead on the spot si Rebelala nga naigo sa iyang ulo ug likod nga bahin sa lawas niini.
Gisapupo sab sa mga sibilyan si Kaha dayon gidala sa Maguindanao Provincial Hospital kinsa anaa sa grabeng kahimtang.
Mga kolektor sa usa ka lending company sa Midsayap, Cotabato ang mga biktima.
Sa kasamtangan, ang kapulisan sa Datu Hoffer Ampatuan, Maguindanao padayon nga nag-imbestiga kalabutan sa maong hitabo. (Edgar Fuerzas)