NABUGTUAN sa kinabuhi ang usa ka negusyante nga gipusil ug giitsahan pa og granada ang iyang balay alas 9 sa gabii niadtong Dominggo, Oktubre 18, 2020, didto sa Siyudad sa Kidapawan.
Giila ang biktima nga si Mark Romerde, buy and sell nga negusyante, minyo ug nagpuyo sa Barangay Singao, Kidapawan City.
Gibutyag ni Kidapawan City Chief of Police Lieutenant Colonel Ramel Hojilla nga kalit dunay nanuktok sa balay sa biktima diin atol sa paggawas niini didto na siya gipusil gamit ang kalibre .45 nga pistola.
Bag-o miikyas ang mga suspetsado, giitsahan pa og granada ang balay ni Romerde.
Patay on the spot ang biktima nga naigo sa iyang ulo ug dughan.
Luwas sab ang pamilya sa negusyante nga mitago sulod sa ilang balay atol sa pagpamusil kang Romerde nga gisundan sa pagbusikad sa granada.
Sa kasamtangan, padayon ang kapulisan sa Kidapawan City nga nag-imbestiga kalabutan sa maong hitabo. (Edgar Fuerzas)