ANAA na sa poder sa Pulang Bagani Command sa New People's Army (NPA) ang utok sa pagpatay sa tigbalita sa Siyudad sa Kidapawan niadtong Hulyo 10, 2019.
Giila ang suspek nga mao si Dante Encarnacion Tabusares alyas Bong Encarnacion nga usa ka sakop sa media sa Kidapawan City ug Kapa Media Coordinator.
Si Tabusares maoy gitudlo nga utok sa pagpatay sa kanhi Brigada News FM Kidapawan City Station Manager Eduardo “Ed” Dizon.
Una nga gikomperma ni Captain Jonathan Zata ang nangulo sa Public Affairs Office sa Armed Forces of The Philippines (AFP) nga si Tabusares nagpasakop na sa NPA.
Mianib si Tabusares sa Communist Party of the Philippines-New People's Army (CPP-NPA) nga nakabase sa Arakan, North Cotabato ilawom sa Guirella Front Committee 53 ug sa pundok sa Pulang Bagani Command.
Gipamahayag sab ni Presidential Task Force on Media Security Executive Director Undersecretary Joel Sy Egco nga sa taho sa militar, ila na karon nga natumbok nga tinuod nga si Tabusares anaa na sa pundok sa mga walhong grupo.
Gidugang ni Egco nga bisan anaa na sa pundok sa NPA, dili gihapon siya makalusot sa iyang kaso gumikan pangitaon gihapon siya sa mga awtoridad ug dakpon.
Kahinumdoman nga grabeng gibatikos ni Dizon ang usa sa pinakadako nga investmest scam sa nasud nga Kapa Ministry International nga maoy hinungdan sa ilang dumot ni Tabusares.
Sa kasamtangan, si Tabusares ang padayon nga gipangita sa mga sundalo ug pulis sa Arakan North Cotabato. (Edgar Fuerzas)