MAKADAWAT na unya ang mga senior citizen sa dakbayan sa Mandaue sa ilang nahabiling financial assistance nga P4,000 karong Disyembre 2020.
Nagtigom ang Konseho sa Dakbayan sa Mandaue kauban ang Office of Senior Citizen Affairs (OSCA) president ug representante gikan sa City Social Welfare and Services (CSWS) niadtong Oktubre 19, 2020, aron magsabot sa eskedyul ug pamaagi sa paghatag sa financial assistance.
Si Konsehal Cesar Cabahug, chairman sa Committee on Social Services and Senior Citizens Affairs, nagkanayon nga sa dili madugay ipanghatag na nila ang nahabiling P4,000 apan wa pa nila masuta kung unsang petsaha.
Sa miaging pagpanghatg niadtong Abril, adunay labaw sa 1,881 nga mga senior citizen, nga wala makadawat tungod na-lockdown sa ilang mga probinsya.
Nakadawat sa mga yangongo ug hangyo si Cabahug nga ipadawat nila ang ilang financial assistance.
Gipasalig ni Cabahug nga adunay 90 porsyento nga tsansa nga kadtong wala makadawat niadtong Abril mahimo nga makadawat sa tinuig nila nga assistance nga P8,000 sa Disyembre.
Dunay 22,956 ka nga rehistradong senior citizen sa akbayan sa Mandaue ning tuiga.
Si Melinda Bihag, ang presidente sa Osca sa Dakbayan sa Mandaue, niingon nga muminus pa ang gidaghanon sa mga makadawat sa financial assistance karong Disyembre kon ikompara sa Abril.
Kini tungod kinahanglan pa nila nga i-update ang mga makadawat tungod daghan sab sa ilang miyembro ang mitaliwan na. (KFD)