NAILA ang dakbayan sa Danao nga tig himog paltik nga armas nga gigukod sa kapulisan sa Central Visayas sa dugay na nga panahon apan ning bag-o lang nahibaw-an nga maayo usab sila mo himo’g High Speed Tactical Watercraft (HSTW) nga ginama sa Dynasty.
Ang Philippine National Police naka angkon og 22 ka unit ka speed boats mahimong mo gukod sa mga kriminal nga moagi sa kadagatan tungod kay aduna kini tulo ka makina nga adunay 750 horse power.
Matod ni Police Brigadier General Albert Ignatius Ferro, direktor sa Police Regional Office (PRO) 7, ang maong mga fastcraft gipalit sa PNP Maritime diin duha niini ihatag sa PNP Central Visayas.
Dako kini og ikatabang sa pag bantay sa kadagatan sa Sugbo tungod kay gipalibutan man sa dagat ang tibuok isla sa Cebu.
Tungod niini, aduna siyay plano nga makig-alayon sa mga local government units makaangkon og unit sa HSTW.
Iyang gibutyag nga ang mga durugista ug ang mga terorista mogamit sa kadagatan alang sa ilang illegal nga kalihukan.
Usa niini ang mga sakop sa Abu Sayyaf nga naka sulod sa Bohol niadtong 2016 nga na engkwentro sa mga sakop sa Philippine Army ug kapulisan.
Ning panahon nga buksan na pagbalik ang turismo Bohol ug Central Visayas kinahanglang bantayan kini. (AYB)