TUNGOD sa nakita nga daghang plastik nga botilya sa tubig nga nakabara sa mga kanal ug ubang agianan sa tubig sa dakbayan sa Sugbo, si Mayor Edgardo Labella makigtagbo sa mga tagdumala sa tighimo og plastic bottled water karong Martes, Oktubre 20, alas 10:00 sa buntag.
Si Labella gusto nga mapangitaan og solusyon ang padayon nga pagkatag sa basura sama sa walay sulod nga botelya sa tubig.
Ang mga basiyo nga botelya sa tubig usa sa hinungdan sa pagkabara sa mga kanal sa dakbayan sa Sugbo nga moresulta sa pag-awas sa tubig nga maoy hinungdan sa lunop.
Tuyo ni Labella nga himuong kaabag ang mga kompaniya nga maoy nagbaligya niini sama sa pagbutabg og garbage receptacle sa mga lugar nga maoy sagad agianan sa mga tawo.
Ang Cebu City giigo og dili tiaw nga baha sa miaging semana nga daw nahimong “swimming pool” ang hapit tanan nga mga patag nga karsada sa dakbayan sanglit ang tubig dili na makadagayday ngadto sa kanal o sapa.
Ilang nakita base sa gihimo nga clearing operation sa Department of Public Services (DPS) ubos sa pagpangulo ni Atty. Jigo Dacua nga labing daghan sa ilang nakuha nga botelya sa tubig nga gianod sa baha ug napaslak sa mga manhole.
Taliwala niini, ang mayor nanawagan sa katawhan nga ang tanan magbaton og disiplina ug dili ipataka og labay ang ilang mga basura labi na ang mga plastic sanglit kon adunay baha, ang tanan maoy maapektohan sa pag-awas sa tubig o baha. (PAC)