TALANDUGON ang kahimtang sa negosyante human gipusil sa iyang karibal sa usa ka babaye niadtong Dominggo, Oktubre 18, 2020 alas 6:00 sa gabii a Sitio Bung-aw, Barangay Pondol, Lungsod sa Balamban.
Si Eulalio Sepada, 49, mekaniko ug dunay kapuyo sa nahisgutang lugar, samdan human gipusil ni Jomar Fernandez, hingkod, kanhi sundalo ug taga Barangay Pondol apan tua na nagpuyo sa Barangay Cantibas, Balamban.
Si Police Chief Master Sgt. Philip Acaso, imbestigador sa Balamban Police Station nga nahinabi sa Superbalita Cebu, nagkanayon nga si Sepada diha sa sulod sa iyang gipuy-an niadtong higayuna.
Si Fernandez gikatahong mitayming nga brownout niadtong higayuna kay nag-ayo sa linya sa kuryente ang Cebeco 3.
Nakasulod kini dayon gipusil si Sepada sa makaduha gamit ang kalibre .45.
Ang kabanay nga silingan ni Sepada nidali sa pagdala sa negosyante sa Balamban District Hospital apan, gibalhin sa tambalanan sa dakbayan sa Sugbo tungod sa kritikal nga kahimtang niini.
Ang mga nakasaksi nakakita ni Fernandez nga paspas nga nibiya sa dapit sakay sa iyang motorsiklo ngadto sa wa matino nga direksiyon.
Samtang, si Sepada nga didto na sa ospital nibutyag usab nga si Fernande maoy nipusil kaniya.
Dugang nasayran sa kapulisan nga ang duha nagkalalis na ug nagkasinumbagay sa sayong bahin ning buwana tungod sa panag-ilog sa usa ka babaye apan, ang maong insidete wala na ma-blotter sa kapulisan.
Sa pagkakaron, giandam na sa kapulisan ang kasong frustrated murder batok sa maong suspek, kinsa gipangita pa atol ning pagsuwat. (GPL)