SUPERBALITA CEBU

Tambagi ko Noy Kulas: Dunot nga kagahapon

DEAR Noy Kulas,

Tagoa lang ko sa ngan nga Bern. Minyo na ko ug dunay mga anak. Ang akong eldest di anak sa akong bana kay single mom ko dihang nagkauyab mi ug iya kong gipakaslan.

Dihang nanguyab siya nako, ako na siyang giprangkahan nga niagi na ko sa mga kamot sa mga lalake. Ako pa siyang gisultihan kon pila ug giapil pa nako ang names nila. Kana bang open kaayo ko aron wa siyay ikasulti nako kay duna koy gitago niya. Nakasabot ra kuno siya sa tanan. Months later ako siyang gisugot ug ni-propose siya nako. Nagtuo ko nga siya na ang lalakeng gihatag sa Ginuo nako. Nagtuo ko.

Karon lang bag-o, ako siyang nasakpan nga nakig-communicate sa iyang ex-girlfriend. Ako siyang nasakpan nga duna silay anak. Pwerte nakong sukoa kay kinsa ba ang di masuko nga samtang ako transparent kaayo niya, siya dunay gitagoan.

Instead mangayo og pasaylo, pwerte na niyang isoga kay wa kuno koy katungod nga manghusga sa iyang past kay mas bati kuno ko og kagahapon kay maora kuno ko og puta, daghang lalakeng nakatilaw. Ako sab siyang giingnan nga nakahibawo na siya tanan ug nganong iya man kong gipakaslan.

Gusto na ko molayas diri sa among balay. Maayo kaha mobiya ko u gang among mga anak? Kaya ra nako silang buhion tanan. Tambagi ko, Noy Kulas. Daghang salamat.

BERN

Bern,

Ayaw una pagdali-dalig hukom labina kay naa ka pa karon sa kalagot. Kamong duha naa sa kalagot kay di siya modawat sa iyang sayop nga pagtago kabahin sa iyang anak. Bitaw, sakto ka. Imo nang gihukasan ang imong pagkatawo sa dihang nanguyab pa lang siya nimo aron makahuna-huna siyag maayo una pa siya modesisyon. And naka decide siyang manguyab nimo ug gipakaslan ka pa.

Lisod man gud kon mobiya ka dayon samtang naa pa sa kainit ang inyong mga ulo. Wa pa mo sa maayong panghuna-huna ug paminsar. Unya ang mga bata ang maapektuhan og maayo. Usually sa away sa mga ginikanan, ang mga anak maoy masakitan og maayo.

Una, dawata una ang nahitabo niya. Sakit man tuod ang iyang gipanulti but siya mismo naa sa kasuko, nagpataka na lang og gahot. Pag-ampo og maayo aron mabalik ang kanhi.

NOY KULAS


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!