NAUNSA man kining kadagkuan sa Syudad sa Sugbo nga nahibong man nganong nidaghan ang manglimos karon sa Syudad sa Sugbo? Wa ba mo makasabot nga daghan ang nawad-an og trabaho karon ug pipila kanila nagsalig na lang sa pagpangayo?
Lisod na daan ang panginabuhi kaniadtong wala pay Covid-19. Nisamot gyud ang kahimtang karon. Apan kining naa sa poder manakop hinuon niining napugos sa panglimos. Matod pa, naay balaod batok sa panglimos. Magsalig na lang kuno sa pagpangayo.
Apan, unsay klarong panginabuhi ang inyong matabang kanila? Igo lang panghadlok nga dakpon? Naa ganiy mga tawo nga morisgo sa pagpamaligya diha sa kadalanan dakpon man gani. Hahay, nagsalig lang gyud ning mga naa sa katungdanan nga nakapabor.
Imbes law and order ang inyong mindset, angay unta nga livelihood alang sa mga kabus labi na niining napugos na lang sa pagpanglimos. Bisan unsaon pa na ninyo og pahumot pinaagi sa press release, makita man ang naa sa inyong kasingkasing pinaagi sa inyong aksyon.
Maayo unta hinuktokan kini ni Mayor Edgar Labella.
PIALAGO
Okay ra man unta kon ordinaryong mga trolls, nga nasakpan karong bag-o nga mga pulis ug sundawo, ang magsigig panaway nganong gihatagan og atensyon ang nahitabo sa detenidong si Reina Mae Nasino.
Alang sa wala masuweto, si Nasino mao ang dinakpan nga inahan diin gipugos siyag pabuwag sa iyang bag-ong natawo nga anak nga si River. Matod pa sa korte, di maayo alang sa usa ka masuso nga anha sa prisohan. Apan, tungod sa gibuhat sa korte, namatay hinuon ang iyang anak nga si River.
Karon, naulaw tingale ang huwes, nitugot kini nga mobisita si Nasino sa lubong sa iyang anak. Apan, overkill ang gibuhat sa iyang mga guwardiya.
Gawas nga giposasan, grabi gyud ka gwardiyado kini. Mura siya og dakong lider sa mga terorista. Sa pagkatinuod, usa lang kini ka aktibista nga gipasakaan og sumbong nga possession of illegal firearms, uban sa pipila ka kaso. Wala pa kini makombikto.
Ang nahitabo kang Nasino nakakuha sa atensyon sa mga media didto sa kaulohan. Ug ang niresulta nga publicity maoy nakapalagot sa mga DDS.
Matod pa, nganong gihatagan kuno og dakong atensyon ang nahitabo sa usa ka Walhon? Alang kanila, okay lang nga higpitan ang mga Walhon. Apan ang kakumbikto nga si Imelda, pasagdan lang. Gani, ang bana niini nga diktador ug kawatan, gilubong pa sa Libingan ng mga Bayani.
Alang kanako, wa may kaso kon kining mga way ayong trolls nga Marcos loyalists ug mga DDS ang magpakita sa ilang pagka-ignorante sa balaod. Apan lahi na kon ang spokesperson mismo sa Metro Manila Development Authority (MMDA) nga si Celine Pialago mosakay sa isyo nga murag DDS. Gihimo na kunong afternoon drama ang nahitabo.
Of course, kay hinanggaw man ang pagtratar sa maong inahan. @anol_cebu sa Twitter