Nalzaro: Lulinghayaw o proteksiyon?
ANG Inter-Agency Task Force for the Management of Emerging Infectious Diseases (IATF) miusab na sa ilang guidelines kon unsa nga pangidaron ang tugutan nang makagawas sa ilang mga pinuy-anan. Kaniadto, gikan sa 21 anyos paubos ug 60 anyos pataas gidid-an nga makagawas sa ilang mga panimalay. Apan karon, gikan na sa 15 anyos hangtod sa 65 anyos gitugutan. Hinuon, ang mga lokal nga kagamhanan gihatagan og igong katungod sa paghukom kon ila ba kining sundon o dili.
Pero kinsa ba nga local chief executive ang mosupak niini nga dugay naman intawon nanghangyo ang mga ginikanan sa mga minor ug senior citizens nga tugutan unta silang makagawas? Matod pa sa mga opisyal sa IATF nga ila nang gitugutan ang maong pangidaron aron makalulinghayaw na sila ug pagtabang usab kini nga makabangon ang ekonomiya nga grabeng naapektuhan sa pandemya.
Sakto kaha kining nakab-ot nga desisyon sa IATF ning maong isyo? Dili kaha kini makahatag og hulga sa panglawas ning maong mga pangidaron o posible nga mosaka og balik ang mga kaso sa Covid 19? Ang gihatagan og gibug-aton sa IATF mao lang ang mental health sa mga batan-on ug senior citizens nga dili sila maburyong sa ilang kanunay nga pagpuyo sa ilang mga panimalay. Lulinghayaw ra man ang ilang gusto, labi pa sa mga batan-on.
Kon maghisgot kita og ekonomiya, unsa may ikatampo ning mga menor de edad nga wala man kini silay income ug nagsalig ra sa ilang mga ginikanan? Dili man kini sila makapamalit sa ilang kaugalingon. Suroy lang sa mga mall ug happy-happy mao ray ilang matampo? Sa pagtugot kanila nga makagawas, wala kaha nila i-expose ang ilang kaugalingon sa virus?
Kon mao ning kalakiha, nganong dili man lang nato tugutan ang mga senior high school ug college students nga mobalik sa pag-eskuwela sa face to face learning? Nganong ato man ipadayon ang on line nga dako na man hinuong gasto. Ang pangutana kon isugal ba sa ilang mga ginikanan ang pagpagawas sa ilang mga anak? Unsa may atong palabihon, ang hatagan og kagawasan ang mga batan-on nga makalulinghayaw o proteksiyon sa ilang panglawas? (bobbygnalzaro@gmail.com)