SA SESSION sa Cebu City Council niadtong miaging semana, si Department of Public Works and Highways (DPHW) Regional Director Edgar Tabacon nibutyag nga mao diay nga magbaha sa may Mambaling underpass tungod kay naputol ang drainage dihang gitukod ang mao nga proyekto.
Masulbad lang kini kon mapalapdan ang karsada sa duha ka mga kilid aron mabutang ang drainage sa ingon di na magbaha. Apan naproblema ang DPWH sa pagpadayon ug pagdali sa proyekto tungod sa suliran sa road-right-of-way (RROW), nga naandan na sa mga road project sa kagamhanan.
Nganong gipadayon man ang proyekto nga unta nahibaw-an na man nga magmugna kini og dakong problema ug purwesyo sa mga lumolupyo sa mga dapit nga naglibot niini? Seguradong nakahibawo niini ang highway officials nga kon maputol ang drainage, masampungan ang agas sa tubig, momugna kini og baha sa kabalayan.
Mao diay nga ang mao nga bahin sa Natalio Bacalso Avenue ug sa pipila ka sikbit nga mga dapit, magbaha nga unta, wa kini mahitabo kaniadto. Kon naa man, di grabe. Karon nga nakamugna kini og danyos, di ba kinahanglan ang imbestigasyon aron dunay manubag sa nahimong perdisyon sa baha? Di ba usa kini ka matang sa pagpabaya o negligence?
Ngano kaha nga gipamugos man ang pagpadayon sa mao nga proyekto nga wa pa man diay maplantsa ang ubang bahin, nga mao ang RROW? Unya gipadayon ang pagtukod sa proyekto nga wa makasulbad sa suliran sa trapiko. Hinunoa, nakamugna pa og problema. Giingon nga si Cebu City south district Representative Rodrigo Abellanosa gikataho nga nisaad nga dunay catchment area sa tubig nga tumbas sa 10 ka Olympic-sized swimming pool, apan wa kini mahitabo.
Labaw pa sa 10 ka Olympic-sized nga swimming pool ang baha nga mamugna sa dapit kon magbunok ang uwan. Busa, kinahanglang dunay manubag ning gama sa tawo nga katalagman.