SUPERBALITA DAVAO

Dura: Public mental health

Ratsada

GIKINAHANGLAN nato karon ang kaamgohan (awareness) labot sa importansya sa public mental health, ilabi na sa mga hagit nga atong gisagubang karon tungod sa Covid-19 pandemic.

Mao nga nakadayeg ako sa Department of Health (DOH) nga nakigbuligay sa World Health Organization (WHO) sa pagpasiugda sa kampanya labot ning maong hisgutanan.

Isip pagtamod sa ilang kampanya, gilunsad sa DOH ang mga aktibidades sa National Mental Health Awareness Week niadtong Oktubre 13, 2020.

Misalmot niini ang nagkadaiyang sektor lakip na ang sektor sa edukasyon nga nagsuporta sa kaayuhan sa kahimsog sa panghuna-una sa ilang mga estudyante.

Dinhi sa siyudad sa Davao, usa sa misuporta sa selebrasyon mao ang University of Mindanao pinaagi sa pagsibog sa ilang klase sa ikaduhang term sa unang semester gikan sa orihinal nga eskedyul nga Oktubre 19 ngadto na sa Oktubre 26 ning tuiga.

Sa maong pagsuporta, makapahulay ang mga estudyante sa pag-atiman sa ilang online classes sulod sa usa ka semana. Sa tibuok kalibutan, ang labing dali nga masakitan nga populasyon mao kadtong nag-edad og 15 anyos ngadto sa 29 anyos.

Ang kamatayon labot sa mental health mao usab ang ikaduhang nag-unang hinungdan ang pagkaangol sa maong age group.

Bisan pa man nga ang Pilipinas naa sa ikalima sa global optimism index, ang National Center for Mental Health (NCMH) nagpahibalo nga dunay pagsaka sa ihap sa tawag sa ilang buhatan labot sa depresyon, nga ang ihap gikan 80 ka tawag sa wa pa ang lockdown ngadto sa 400 ning panahon sa pandemya.

Kini nga mga ihap nagpakita lamang nga daghan ang nagkinahanglan og programa nga makawagtang sa buling (stigma) nga naglimin sa mental health. Kasagaran, ang mga Pinoy wa naanad nga ilang ipaambit ang kalisdanan sa kahimsog sa pangutok sa kahadlok nga sila bugal-bugalan, o hukman nga nabuang.

Mao kini ang hinungdan nga daghan ang mga kabataan nga naghikog tungod kay walay tawo nga nakatabang nila nga malikayan ang depresyon. Gani, kagahapong adlawa napatik sa Superbalita nga duha ka mga bata-on ang nagpakamatay tungod wa nakaya ang problema.

Sa mga suki natong tigbasa, kung ugaling duna kamoy suliran, ang National Center for Mental Health (NCMH) makatabang kaninyo pinaagi sa ilang psychosocial services sama sa "Kamusta Ka? Tara Usap Tayo," nga gilunsad niadtong Mayo 2, 2019.

Ang ilang hotline abli 24 oras sulod sa pito ka adlaw kada semana nga maoy mohatag kaninyo og psychological first aid.

Kining isyu sa mental health, di lamang kini buluhaton sa NCMH, apan buluhaton usab kini sa miyembro sa pamilya, komunidad, tagdumala sa trabahoan, lokal ug nasyunal nga kagamhanan, ilabi na ning panahon sa pandemya. Busa, magpakabana kita, mga higala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph