TAGUM CITY, Davao del Norte -- Mokabat kapin kun kulang 400 ka mga purok chairman ang gipailawom sa self-quarantine human nagpositibo sa coronavirus ang usa sa mga nakauban nila sa gipahitabong quarterly meeting didto sa City Hall sa siyudad sa Tagum niadtong Oktubre 1, 2020.
Matud pa nga matag kuwarter sa bulan, ang mga purok chairman sa siyudad adunay panagtigom dungan sa paghatag sa ilang konsumo nga usa ka sakong bugas.
Nagsugod alas 7:30 sa buntag ang tigom ug nahuman alas 11:30 sa buntag sa samang adlaw ug gitambungan sa kapin 400 ka mga purok chairman gikan sa nagkalain-laing barangay sa siyudad.
Gibutyag nga Oktubre 8, 2020 na gipahibawo ang mga purok chairman nga dunay nakauban nila sa tigom nga nagpositibo sa coronavirus, hinungdan nga sila giawhag nga mag-self quarantine sa tagsa-tagsa nila ka mga panimalay.
Samtang ang nagpositibo nga purok chairman gibutang sa isolation facility sa siyudad nga atoa mahimutang sa Barangay Canocotan ug padayon gitambalan aron mamaayo.
Hinuon ning kasamtangan, wa'y nabalita nga dunay laing purok chairman sa siyudad nga nagpositibo sa virus.
Samtang ang ubang purok chairman nga nakatambong sa maong tigom mibalik na sa tagsa-tagsa nila ka mga trabaho niadtong adlaw'ng Lunes, Oktubre 19, 2020, human sa kapin usa ka semana nga gihimong self-quarantine.