DUNAY mga Sugboanong basketballl leaders karon nga nagtinguha nga mahibalik ang commercial basketball league dinhi sa Sugbo.
Dili nato ikalimod nga sulod na sa hataas nga panahon wala na gyuy napahigayon nga commercial league nga nagtikawtikaw dinhi sa Sugbo.
Modagan na og kapin sa dekada nga uhaw ang mga Sugboanon sa mga dekalidad nga basketball tournament human nga nag-anam-anam og kabungkag ang Cebu Basketball League (CBL), ang Mandaue Industrial and Commercial Athletic Association (MICAA) ug ang Cebu Basketball Federation (CBF).
Kaniadto gud, sigon sa akong nahinumdoman, human sa lega sa Cebu Amateur Athletic Association (CAAA) nga mao na ang Cesafi karon, sundan dayon kini og CBL Christmas League.
Human niini, ang bulan sa Enero ug Pebrero gigahin usab alang sa Zonal Elimination alang sa National Inter-collegiate basketball tournament samtang mosunod usab dayon ang CBL summer league nga ipahigayon sa bulan sa Abril o Mayo.
Ingon ani ka lingaw ang basketball kaniadto, mga duha o tulo ka dekada ang nakalabay. Lab-as pa sa akong panumdoman ang mga teams kaniadto sama sa Sieko, Island Feedmills, Golden Sun Pottery, La Fortuna Bakery, RRA Paint, M. Lhuillier Jewelers, Balls Discotheque, Crispa-Cebu, PLDT, VFI El Rancho, Sports Summit ug daghan pa.
Ang nakapadugang sa kolor sa torneyo mao ang presensiya sa mga inilang basketbolista didto sa Kaulohan aron mo-reinforced sa mga teams.
Dunay mga Sugboanon nga didto na magbasehan sa Manila ang manguli dinhi sa Sugbo aron mo-reinforce sa ilang kanhi team. Bibo gyud kaayo. Sugwak permi ang USC gym.
Pero karon, mingaw pa sa tirana. Maayo lang og dunay mga lungsod og mga local government unit (LGU) nga magpalega unya salmotan og mga semi-commercial teams.
Sukwahi kaniadto, wala nay permamenting tournament nga tultolon sa mga basketball aficionados.
Sa niaging semana, dunay panagtigom ang pipila ka mga basketball leaders sa Sugbo nga gipangulohan ni Atty. Baldomero Estenzo ug businessman/sportsman Lorenzo Chao Sy.
Sentro sa gituki mao ang paghibalik sa commercial league sa Sugbo. Dunay mga prospected team owners nga ilang imbitahon nga maoy molangkob unya sa asosasyon nga hulmahon.
Pasiuna pa man tuod kadto nga panagtagbo apan gituohan nga gawas sa pipila ka mga businessmen sa Sugbo, moayuda ug mopaluyo usab ang Philippine Sports Commission (PSC).
“Our purpose here nga mahatagan og igong exposure ang atong mga players nga di na kinahanglan moadto pag Manila. Risgo man gud nang moadto sa Manila ilabi na og way kaabtan kay gasto kaayo,” matod ni Estenzo kinsa maoy utok sa pagkahimugso sa Cesafi ug Micaa.
Samtang si Sy, tag-iya sa La Fortuna team ug mao usab karon ang vice-chairman sa Cebu City Sports Commission (CCSC), sa iyang bahin, mipadayag usab nga kinahanglang hatagan og igong proteksiyon ang mga team owners ilabi na sa pinansiyal nga aspeto.
“Atong paninguhaon nga dili kaayo makagasto ang mga team owners. Protektahan nato kay dili lalim ang paggasto og team. Kinahanglan uniform gyud ang mga allowances para dunay balance ang competition,” ni Sy pa.
Gilantawan nga ang kanhi PBA legend nga si Elmer “Boy” Cabahug maoy himuong commissioner. Dili bag-o ni Cabahug ang maong posisyon, sanglit nahimo na man usab kini siyang commissioner sa CBL kaniadto.
Sa pagkakaron, dili pa matino kon pila ka mga team owners ang mo-join sa asosasyon apan target nila nga adunay walo ka mga teams ang moapil sa unang torneyo ning paghibalik sa lega.
Hinaot nga molampos kining maong tinguha.
* * *
SABONG TA, BAI!
Sa niaging semana, daghang kilay ang miisa sa dihang gianunsyo ni Cebu City Mayor Edgar Labella nga dili siya mosugot nga ibalik ang operation sa sabong.
Kini bisan pa man og aduna nay pagtugot sa Inter-Agence Task Force (IATF) ubos sa pahimangno nga kinahanglan mosunod sa mga protocol nga ilang ilagda.
Kon ang mga sabongero sa ubang dakbayan ug kalungsoran nagmaya tungod kay wala may pagbabag ang ilang tagsatagsa ka local government unit (LGU), ang sa Cebu City labihang kasagmuyo.
Pero, kagahapon, nakadawat sila og good news. Kini tungod kay, matod pa, mosugot na diay si Labella ug iyang gibakwi ang una niyang pamahayag. Gani maghimo sila og mga guidelines aron mao kini ipasunod. So, tuloy na ang ligaya, Atty. Louie Arma ug Mr. Jay Li. (jun.migallen22@gmail.com)