SUPERBALITA CEBU

Editoryal: Mga batang libud-suroy

Editorial Cartoon by Ariel Itumay

MAKALULUOY tan-awon ang mga tawo nga naa matulog matag gabii sa mga aseras sa dakbayan sa Sugbo. Mas makaluluoy ang mga bata nga libud-suroy human inosente. Wala masayod sa ilang kahimtang. Managlahi ang istorya sa ilang kinabuhi apan parehong biktima sa panahon.

Ang Department of Social Walfare and Development (DSWD) maoy tukma nga ahensiya sa kagamhanan sa pagtabang kanila nga mapahiluna sa tukma nga dapit o puluy-anan. Apan dili makanunayon tungod sa kadaghan ug halapad nga tahas nga gisangon sa ahensiya sama sa 4Ps, social amelioration fund (SAF) ngadto sa pag-abag sa mga emerhensiya ug katalagman.

Busa dalaygon ang lakang ug inisyatiba sa mga pribadong sektor ug lokal nga kagamhanan sa pagluwas sa mga tawo nanagpuyo sa aseras ug mga batang libud-suroy nga mabalik sa ilang dapit o pagpahiluna sa tukma nga pinuy-anan.

Ang Prevention, Restoration, Order, Beautification and Enhancement (Probe) team sa dakbayan sa Sugbo nilusad og one time big time rescue operation niadtong Oktubre 16, Biyernes, diin 154 ka mga bata ang ilang naluwas nga gibutang sa halfway house.

Ug ang Cebu City Government makigtambayayong usab sa Simbahang Katoliko para mahipos ang mga libud-suroy nga sagad anha mangatulog duol sa simbahan. Kini ang gipadayag ni Mayor Edgardo Labella human ilang nasuta nga ang mga simbahan maghatagan og pagkaon sa maong mga indibiduwal labi na kadtong duol sa ilang parokya.

Dugang sa mayor nga hangyuon nila kini nga motabang pagpasabot ug moawhag sa street dwellers nga mopauli sa ilang mga pinuy-anan inig human og dawat sa pagkaon gikan sa simbahan.

Kinahanglan nga malangkubon ang pagtabang kanila aron mahaw-as sa kalisod pinaagi sa paghatag og panginabuhian aron dili kanunay magsalig sa pagpalimos o hinabang.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph