Border control sa mga isla sa lalawigan gilibkas

ARON mas sayon alang sa mga turista ug residente sa pagtabok sa isla ug makasuroy sa tourist destinations, gilibkas na ang estriktong border control sa isla.

Mao kini ang gipahibaw sa Cebu Provincial Government pinaagi sa ilang news portal.

Ang maong lakang nadesisyonan atol sa pagbisita ni Cebu Governor Gwendolyn Garcia sa lungsod diin usa ka tigum usab ang gipahigayon kauban sila si Sta. Fe Mayor Ithamar Espinosa, Madridejos Mayor Salvador Dela Fuente ug Bantayan Mayor Arthur Despi sa isla sa Sta. Fe Cultural and Sports Complex.

Usa sa concern sa mga konstituwente mao ang kalibog sa gipatuman nga restrictions ug border control sa tulo ka mga lungsod kon diin moagi ang mga frontliner ug authorized persons outside residence (Apor).

“As far as meeting gahapon, among nasabutan nga wala na’y mga restriction, dili na i-hamper ang movement sa tawo within MGCQ area lang,” matod ni Espinosa sa Oktubre 18.

Gilaraw nga usa ka hiniusang kamandoan ang luwatan sa tulo ka mga mayor alang sa mga lagda nga angay subayon sa mga residente sa isla.

Paagi kini nga malikayan ang kalibog ug kahasol sa mga motabok sa mga lugar sa Probinsya.

“So, maghimo kami san EO mga mayor, dapat mag-consult anay kami kan Governor una pa kami mag release san EO,” matod ni Dela Fuente.

Gisubli ni Garcia nga sukad nga gipaubos na sa modified general community quarantine (MGCQ) ang lalawigan sa Sugbo, gipaluagan na ang restrictions aron mas dali ang paglabang sa mga turista nga sa ingon makabangon ang ekonomiya sa probinsya.

Sukad niadtong unang semana sa Agusto 2020, hinayhinay nang gibuksan ni Garcia ang mga tour destination sa lalawigan.

Iyang giuna ang pagbukas sa whale watching sa Oslob nga inila na kaayo ug kanunay gidagsa sa mga turistang lokal ug langyaw. (ANV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph