SUPERBALITA CEBU

Tanod sa Tisa nag-inom sa quarantine checkpoint?

IPAUBOS sa imbestigasyon kadtong mga tanod sa Barangay Tisa, Dakbayan sa Sugbo nga nakuhaan og hulagway nga gi-post sa social media, samtang nag-inom sa barangay control point.

Apan sa inisyal nga fact finding inquiry nga gihimo sa konseho sa barangay ang maong mga hingtundang tanod mihimakak nga nag-inom niadtong higayona.

Si Police Colonel Josefino Ligan, hepe sa Cebu City Police Office, nipahibawo nga iyang gitahasan ang hepe sa Labangon police station sa paghimo og pakisusi sa mikatap nga hulagway nga gi-post niadto pang miaging semana.

Gipasabot ni Ligan nga bisan gitugotan na nga maka-inom og ilimnong makahubog ang publiko apan dili pa mahimong mag-inom sa gawas ug labaw na diha sa barangay control point.

Gihulagway sa opisyal nga salikwaot tan-awon nga ang mga nagbantay sa barangay control point aron ipatuman ang minimum health standard apan sila na hinuon ang nagpabadlong.

“I will direct my chief of police in station 10 to coordinate with the barangay officials para mahibaw-an kung kinsa tong duty at that time. Then whatever sanction nga i-impose sa barangay officials atong mga tawhana mahatagan pud ug leksiyon,” matod ni Ligan.

Mipasidaan ang opisyal nga kon masuta nga nag-inom gyud ang maong mga tanod mahimong mapasakaan sila og kaso ug irekomendar niini nga ipataktak sa ilang serbisyo.

Samtang si Tisa Barangay Kapitan Ringo Pacaña nipahibawo nga ang konseho sa barangay adunay gihimong linaing imbestigasyon ug sa inisyal nga impormasyon nihimakak ang lima ka tanod nga nakuhaan og hulagway nga nag-inom.

“Wa may nakita nga botelya sa beer diha sa lamesa, pulos ra mga mineral water,” tipik sa saysay ni Pacaña sa dihang nahinabi sa Superbalita Cebu.

Apan adunay laing hulagway nga nakuha sa duha ka naglakaw nga tanod samtang ang usa niini nagbitbit og botelya sa ilimnong makahubog nga matod pa gisugo sa iyang asawa sa pagpalit ngadto sa tindahan.

Nagkanayon si Pacaña nga off duty ang maong mga tanod nga igo lang nagtambay sa barangay control point.

Dugang pa sa kapitan nga ilang pa-abuton ang resulta sa maong fact finding inquiry sa konseho sa barangay. (AYB, FVQ)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph