GIDILI pa gihapon sa mga dakbayan sa Mandaue ug Talisay ang pagpahigayon og sabong taliwala sa giluwatang resolution sa Inter-Agency Task Force (IATF) nga mitugot sa maong kalingawan.
Pamahayag ni Atty. John Eddu Ibañez, executive secretary ni Mandaue City Mayor Jonas Cortes, nga nabalaka sila sa risgo sa higayon nga motugot sila sa mga kalihokan nga magpatapok og mga tawo.
Matod pa niya nga dili sila gusto nga mausik ang tanang gihimong sakripisyo sa dakbayan aron masugpo ang Covid-19 gumikan lang sa pag-abli sa sabungan.
Giklaro ni Ibañez nga kanunay gisuportahan sa Dakbayan sa Mandaue ang bisan unsang desisyon sa IATF apan sa pagkakaron, dili una sila motuman niini samtang anaa pa sa pandemiya.
Gani, ang Mandaue City Police, mga barangay tanod, ug uban pa nga mga regulatory nga buhatan kanunay mag-roving aron pagpatuman ug pagdakop sa mga magtigbakay.
Ang Dakbayan sa Mandaue adunay na lang usa nga nahabilin nga sabungan ang Gallera de Cebu nga nahiluna sa Barangay Tabok.
Sanglit, ang na-ila nga coliseum nga anaa sa Barangay Ibabao-Estancia sa maong dakbayan ang gipasira na
TALISAY
Pangdakpon kadtong ma-atlan nga magsabong o mopahigayon og tigbakay sa Talisay City.
Matod pa ni Police Major Gerard Ace Pelare, hepe sa Talisay City Police Station, wa pa siya makadawat sa kamanduan gikan sa Police Regional Office (PRO-7) ug ni Mayor Gerald Anthony Gullas Jr. hinungdan nga sila wala pay kausaban sa ilang pagpanakop.
Ang Siyudad sa Talisay adunay duha ka buwangan apan pabilin pa sab nga wa pa mag-operate.
CEBU CITY
Samtang sa Dakbayan sa Sugbo, gitahasan ni Mayor Edgar Labella ang chairman sa Cebu City Game Foul Commission sa paghimo og guidelines alang sa posibleng pagbalik sa operasyon sa mga lisensiyadong buwangan.
Si Labella miluwat og memorandum alang ngadto ni Majority Floor Leader Raymond Garcia aron tun-an ang pagbalik og operate sa sabong.
Base sa memo sa mayor, gusto niya nga ang mahimong guidelines pinasubay sa mga lagda sa IATF ug sa Department of Interior and Local Government (DILG) diin gidili ang personal nga pagtambong sa mga sugarol apan gitugot ang online o remote betting ug live broadcasting ug uban pa
Sa dili pa mamugna ang guidelines gitahasan ni Labella si Garcia nga mohimo una og konsultasyon ngadto sa mga sector.
Kini human giaprobahan sa Inter Agency Task Force (IATF) pinaagi sa resolution No. 79 ang pag-operate sa mga buwangan ngadto sa mga lugar nga gipaubos na sa modified enhanced community quarantine (MGCQ). (KFD, BBT, PAC)