SUPERBALITA CEBU

Pulis mipatay sa uyab sa wa pa maghikog

NAGPASAD ang dugo sulod sa sleeping quarters ni Police Lieutenant Fraxilo Albiso sud sa Bulacao Community Precinct, dakbayan sa Talisay, human gipusil niini ang iyang karelasyon nga si Vernice Cardino sa wa pa siya maghikog.

Ang insedente nahitabo Martes sa buntag, Oktubre 20, 2020. Matod ni Police Major Gerard Ace Pelare, hepe sa Talisay City Police Station, nga base sa inisyal nga impormasyon miduaw si Cardino, 31, sa quarters ni Albiso, 51.

Si Albiso minyo ingon man si Cardino ug adunay upat ka mga anak.

Ang mga kaubang pulis diha sa presinto ang nakadungog nalang og upat ka buto sa armas. Dali nga ilang gisusi diin maggikan ang buto ug napalgan nila nga nagbuy-od na ang duha nga nagkadugo sud sa lawak.

Gikataho nga unang gipusil ni Albiso si Cardino sud sa tulo ka higayon tumong sa ulo.

Naghikog sab ang pulis opisyal pinaagi sa pag um-om diha sa iyang baba sa sumbohan sa 9mm nga gituohang maoy gigamit sa pagpusil.

SUKO

Ang sinaligan sa presinto (pangalan wa ibutyag) nagkanayon nga nianang buntag iya nang namatikdan ingon sa gisapot si Albiso.

“Miingon siya sa ako nga, ‘Ate palite sa ko didto ug pagkaon sa gawas’,” saysay sa maong sinaligan dungan sa pagsinyas kaniya nga pagawson sa buhatan.

Wa pay oras gikan sa pagsugo ni Albiso milanog ang buto-buto sa armas diha sud sa quarters. Sigun sab sa maong caretaker nga magkanunayan si Cardino sa opisina ni Albiso.

“Maoy ilang istorya nga wala sila nakadungog nga naglalis kining duha, ang buto sa armas nalang ang ilang nadunggan sa gawas.

“Mao na gusto nako nga ipasusi kon unsa man gyud ang sinugdananan sa ilang away,” matod pa ni PMaj. Pelare.

Gitug-an ni Pelare nga base sa iyang nasayran sa mga kauban sa police official nga aduna kiniy relasyon ngadto ni Cardino.

GIPA-TULFO

Marso 2020 gireklamo si Albiso sa bana ni Cardino nga si Harvey Cardino, 38, nga usa ka seaman pinaagi sa pagdangop sa public service program nga “Raffy Tulfo In Action” sa TV5.

Gani ang maong reklamo giulohan og “Tadtad sa Chikinini.”

Niadtong higayona si Albiso maoy hepe sa lungsod sa Samboan diin ang maong bana mireklamo sa iyang pagduda nga dili siya maoy amahan sa ika-upat nga gisabak sa iyang asawa.

Buot ni Harvey nga maundang ang pakigrelasyon ni Albiso ngadto sa iyang misis ilabi na nga aduna silay mga anak ug mabalik ang malinawon nilang pagpuyo isip magtiayon.

Lakip nga na-interview sa maong programa si Police Colonel Roderick Mariano, kinsa maoy provincial director sa Cebu Police Provincial Office (CPPO) may labot sa giingong pagpangabit ni Albiso ngadto sa minyo nga babaye.

Gani, mitambag si Mariano ngadto sa bana nga moduaw sa iyang buhatan aron nga makuha niini ang kinatibuk-ang istorya.

Aron sab matun-an og kon mapamatud-an sa maong pasangil mapahamtangan sa tukmang lakang ang binuhatan ni Albiso.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph