SUPERBALITA DAVAO

Delos Reyes: Nagserbisyo sa hilom

Yanong Pagsabot

HILOM apan nagapadayon sa pag-serbisyo sa katawhan ang buhatan sa PBA Partylist sa katawhan sa Davao bisan karon nga sa panahon sa pandemya sa Covid-19.

Atong nahibaw-an nga padayon ang paghangop sa katawhan sa opisina sa PBA sa dalang Bonifacio, dakbayan sa Davao aron mangayo og hinabang sa ilang mga problema, apan limitado lang ang ilang mahatagan og serbisyo tungod sa pagsunod sa health protocol aron paglikay nga mapugngan ang pagkuyanap sa Covid-19.

Sa karon, moabot gihapon sa 80 ka tawo ang ilang maserbisyohan ug madawat matag adlaw apan dili sama sa normal nga panahon nga moabot hangtud 150 ang ilang maserbisyohan.

Tungod sa Covid-19, moabot hangtud sa tulo ka adlaw ang mga transaksyon nga kaniadto mahimo ra sa usa ka adlaw, madala sa natungdan ang hinabang sa iyang pag pauli.

Bulahan ang Dakbayan sa Davao kay aktibo sa serbisyo ang mga kongresista sa tulo ka distrito ug naa pa ang mga partylists. Ang uban nga mga dapit, bisan dunay mga opisyal sa gobyerno nga misaad nga moserbisyo sa ilang pagkampanya, dili man makit-an ug maduolan panahon sa panginahanglan.

Sa pamilyang Nograles, ilang namintenar ang ilang imahe ug relasyon sa katawhan nga naghimo kanilang lig-on sa unang distrito sa Dakbayan sa Davao. Giila sila kanhi nga maoy lig-on nga kaatbang sa natad sa politika apan nakighiusa ang mga anak nga Nograles ug nanaad nga dili moatbang sa mga Duterte, hinuon, makighiusa alang sa kalamboan sa Dakabayan sa Davao.

Sa milabay nga eleksyon, gihungihong nga magpapili si kanhi Kongresista Karlo Alexis Nograles pagka Senador apan wala midayon kay iyang gipili ang pagserbisyo sa administrasyon ni President Rodrigo Duterte hulip kang Cabinet Secretary Leoncio Evasco.

Posible nga dayunon ni Nograles ang iyang mga plano sunod eleksyon sa 2022. Usa si congressman Nograles sa author sa libre nga edukasyon sa kolihiyo diha sa mga State Colleges ug Universities tungod sa pagtuo nga dako ang kahimoan sa edukasyon sa pag-usab sa direksyon sa katawhan ug sa kalamboan.

Sa Dakbayan sa Davao, nailhan ang Nograles tungod sa Oplan Eskwela nga naka pagradwar og daghan sa ilang mga eskolar. Daghang Dabawenyo ang nagahandom ug nanaad nga mosuporta ugaling modayon si Atty. Nograles.

Dili magpanuko ang katawhan sa pagsuporta kang Nograles tungod nakita na ang iyang liderato sa tulo ka termino nga siya ang representante sa unang distrito sa dakbayan sa Davao didto sa Kongreso.

Mahimo siyang dugang garbo sa dakbayan kung buligan sa kapalaran nga mahimo siyang senador. Limpyo ang pangalan, wala kay makita nga lama sa pag-abuso sa iyang gahom sa mga tuig sa iyang pagpangalagad; matud sa atong nahinabi, hinungdan nga daghang pasidungog ang iyang nadawat.

Sa atong yano nga pagsabot, nakita na sa taga Mindanao ang kalainan kon duna tay mga opisyal sa senado ug sa kongreso nga nag-aduso sa mga programa alang sa atong kalamboan kay sa miaging mga administrasyon nga salin nalang sa budget sa gobyerno ang atong maangkon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph