GIPADAPLIN una ni Davao City Mayor Sara Duterte-Carpio ang hangyo sa pipila ka Dabawenyo, labi na mga negusyante nga kung mamahimo mob-an ang oras sa curfew hours ning Dakbayan.
Mireklamo na ang sagad mga negusyante gumikan nalugi na sila kay sayo nga manira, tungod kay alas 7 sa gabii magsugod ang curfew.
Apan giingon sa mayor nga ning mga taknaa di una kini hisgutan, inay mohimo og pag-igmat ang mga tawo aron di na motaas pa ang kaso sa coronavirus disease (Covid-19) sa Davao City.
Sa ulahing kamandoan, gipagula ni Mayor Sara nga gikan alas 7 sa gabii hangtud alas 5 sa buntag ang curfew, hangtud kini sa Disyembre 31, 2020.
Dihang gianunsyo kini nga kamandoan, daw nahugno ang kalibutan sa mga negusyante nga bag-uhay pa lamang nanukad alang sa bag-ong new normal, apan karon balik kangitngit na sab. Balik kalbaryo sa mga negusyo.
Hinuon, mas gidasig sa mayor nga magsayo og abli ang mga tindahan, labi na sa Roxas Night Market; giplanohan ang oras nga puwedeng makatinda og sayo.
Bisan paman niini, naglawig gihapon ang mga negusyante sa walay kasiguradohan -- walay direksyon asa maadto ang bag-uhay lamang gibubo nga kapital.
Daghan sab ang nagtuo nga di na unya maabtan sa Disyembre 31, 2020 ang maong bag-ong curfew hours -- mabag-o kini pinaagi sa pag-igmat sa katawhan.
Lagmit mausab lamang kini nga kamandoan ugaling maghinay-hinay og ubos ang kaso sa Covid-19 ning siyudad. Ang pagtuman lang gyud sa katawhan ang dunay dako nga papel sa pagsanta sa Covid-19.