NASUBO ang mayor Digos City human nga gipakatag sa iyang mga kontra sa administrasyon nga gipamolitika niini ang Digos City Contact Tracing System (CCTS).
Gibutyag ni Mayor Josef Cagas nga dili pa mandatory ang CCTS ning kasamtangan apan giimbitahan na ang tanang molupyo sa dakbayan nga magparehistro aron makakuha og identification card nga adunay quick response (QR) code.
Pinaagi sa maong sistema, sayon ra nga matultulan ang nakarekord nga lokasyon sa mga posibleng nataptan sa Covid-19 ug kapugngan ang pagkuyanap sa publiko.
Apan adunay mga nibatikos sa lahi nga sistema sa CCTS sa dakbayan human nga matud pa wa kini nisubay sa sistemang CCTS sa kagamhanang probinsyal.
Giklaro sa mayor nga sa wa pa ang maong lakang. Niadto pang Abril 2020 giplano ug naplastar na sa dakbayan ang ilang CCTS nga gihagoan sa mga personahe sa city hall una gi-presentar ngadto sa mga department heads.
Matod sa mayor nga dako ang iyang kasubo kay bisan ning panahon sa pandemya aduna gihapoy mga tawong buot mosakay sa isyu aron maguba ang mga maayong plano ug programa sa dakbayan. (Orlando B. Dinoy)