164 housing units sa NHA kapuy-an na sa nalinogan

HUMAN sa nahitabong draw lots niadtong Oktubre 13, 2020, mahimo nang kapuy-an sa mga biktima sa linog sa tulo ka purok sa Barangay Tagaytay, Magsaysay, Davao del Sur ang gipangtukod nga balay.

Gibutyag ni Mayor Arthur Davin nga gihan-ay na nila ang turnover ceremony karong sunod nga mga adlaw apan way gitakdang petsa.

Mokabat sa 164 ka mga balay nga gipondohan sa National Housing Authority (NHA) ang mahimo nang puy-an aron nga makahigayon pa sila sa pag-decorate niini una hingpit itunol kanila.

Di pa dugay, mokabat sa 423 ka mga balay ang natunol na sa mga biktima sa linog didto sa Barangay Malawanit, 118 sa Barangay Balnate ug 235 sa Barangay Upper Bala.

Gitataw ni Davin nga human ang pagahimuong turnover ceremony, magdugang pa ang NHA og 258 ka mga housing units alang sa Purok 1 ngadto 5 sa Barangay Tagaytay.

Ubay-ubay pa ka mga balay ang pagatukuron sa NHA sa ilang lugar, diin 61 ka yunit alang sa Barangay San Miguel, 108 sa Barangay Maibo, 99 sa Barangay Tacul ug 65 sa Barangay Malongon.

Apil sa makabenepisyo ang 113 ka mga pamilya sa Barangay New Opon ug 147 sa Barangay Kanapolo.

Tukuran sab og 134 ka balay ang Barangay Bacungan ug 275 sa Barangay Poblacion. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph