MOKABAT sa 22 kilos sa gituohang shabu nga dunay Dangerous Drugs Board (DDB) value nga P150 milyunes nasakmit sa kapulisan sa Dakbayan sa Lapu-Lapu ug Philippine Drug Enforcement Agency (PDEA) 7 mga alas 4:30 sa Miyerkules sa hapon, Oktubre 21, 2020 sa sityo Lawis, Barangay Subabasbas, Dakbayan sa Lapu-Lapu.
Ang suspek nga nasikop sa buy-bust giilang si Gilbert Lumanog, 38, taga Barangay Poblacion, Pinamungajan, Cebu.
Matod ni Police Major Myla Maramag, hepe sa City Intelligence Unit (CIU) sa Lapu-Lapu City Police Office (LCPO) nga usa ka buwan nilang gi-monitor si Lumanog human sila makadawat og impormasyon gikan sa National Capital Regional Office (NCRPO).
Matod ni Maramag nga ila kining gi-follow-up dinhi ug dihang nakompirmar,ilang gipahigayon ang operasyon.
Nagpakaaron ingnon silang mopalit og usa ka kilong shabu.
Dihang natigayon ang transaksyon, ila dayong gidakop si Lumanog.
Sa interogasyon sa mga pulis, si Lumanog nitug-an nga duna pa siyay laing drugas nga dala nga diha sulod sa iyang awto.
Laing 21 ka kilo sa gituohang shabu nadiskobrehan sulod sa maleta. Gipangputos kini og tagsa og golden tea bag.
Si Maramag niingon nga sa ilang imbestigasyon, si Lumanog usa ka drug courier, bodegero ug hagbunganan sa kinilong shabu.
Ang drugas gituohang gi-land trip gikan sa Metro Manila padung dinhi sa Sugbo.
Gisuwayan unta kini og intercept sa kapulisan sa NCRPO, apan nakalusot gyud ang mao nga shipment.
Ang drugas giingong gikan sa sindikato nga naglihok sulod sa New Bilibid Prisons (NBP) sa Muntinlupa City.
Ang operasyon hiniusang gipahigayon uban sa Regional Drug Enforcement Unit (RDEU) ug Regional Intelligence Division (RID).
Mao kini ang ikaduhang labing daghan nga illegal drugs nga nasakmit dinhi sa Sugbo sukad gihingusgan ang kampanya batok sa drugas sa administrasyon ni Presidente Rodrigo Duterte.
Mas daghan ang 28 ka kilong shabu nga nasakmit sa Cebu City Police Office (CCPO) sa ilang duha ka mga buy-bust niadtong Marso 3, 2019 sa lungsod sa Consolacion.(BBT)